सगरमाथा आरोहण गर्ने तयारीमा कविता नेपाली

फिल्म ‘एक्लो’बाट फिल्मी दुनियाँमा प्रवेश गरेकी मोडल कविता नेपालीले विश्वकै अग्लो शिखर सगरमाथा आरोहण गर्ने भएकी छिन् । उनी यतिबेला सगरमाथा आरोहणको आवश्यक तयारीमा जुटेकी छिन् । 

सय भन्दा बढी म्युजिक भिडियोमा काम गरेकी कविता अभिनित पहिलो फिल्म ‘एक्लो’को यूकेमा पोस्ट प्रोडक्सनको काम चलिरहेको छ । साइन्स फिक्सनमा आधारित यो फिल्मको छायांकनका लागि अपर मुस्ताङ पुग्दा आफूलाई सगरमाथा चढ्ने सोच पलाएको कविताको भनाई छ । कविता अहिले सगरमाथा बेस क्याम्पमा तयारी गरिरहेकी छिन् ।

कविताले भनिन्–‘सगरमाथा चढ्नु आफैमा जोखिम काम हो । त्यसमाथि महिलाहरुका लागि झनै जोखिम हो । जोखिम काममा सफलता पाएर नै आफ्नो र देशको नाम राख्ने योजना छ ।’ फिल्म ‘एक्लो’का कार्यकारी निर्माता विनोद सुवेदी ‘क्षितिज’ले कवितालाई आवश्यक सहयोग गर्ने बताए ।

कविताले सामाजिक संजालमा पोष्ट गरेका तस्वीरहरुमा पनि उनी सगरमाथा आरोहणका लागि तयारी गर्दै गरेको देख्न सकिन्छ । यसअघि नायिका निशा अधिकारी र नायक अर्जुन कार्कीले सगरमाथाको सफल आरोहण गरेका थिए ।