कार्सांङ दयाको यस वर्षकै कमजोर फिल्म

दयाहाङ राई अभिनीत फिल्म ‘कार्साङ’ले घरेलु बक्स अफिसमा पहिलो साता कमजोर व्यापार गरेको छ । फिल्मले यस अवधिमा डेढ करोड रुपैयाँ हाराहारीमा ग्रस कलेक्सन गरेको छ ।

यो कमाइ अभिनेता राईको यस वर्ष रिलिज फिल्ममध्ये सबैभन्दा कमजोर व्यापार हो । याम शेर्पा निर्देशित यो फिल्म अभिनेता राईको ६ महिनापछिको रिलिज हो । पहिलो साता फिल्मले देशव्यापी १०० भन्दा बढी शो प्राप्त गरेको थियो । तर व्यापार भने सन्तोषजनक देखिएको छैन ।   

निर्माताले टिकटकमा फिल्म पाइरेसी हुनु जस्ता सस्ता कारणलाई फिल्मको कमजोर व्यापारको रूपमा अघि ल्याएका छन् । तर आफ्नो मेकिंगमा भएको कमजोरीलाई भने नजरअन्दाज गरेको देखिन्छ  ।  

 ‘डिग्री माइला’देखि ‘कार्साङ’सम्म आइपुग्दा यस वर्ष राईका ५ फिल्म रिलिज भएका छन् । जसमध्ये ‘कार्साङ’को व्यापार सबैभन्दा न्यून हो । यस वर्ष अभिनेता राईका ‘डिग्री माइला’, ‘नमसार’, ‘गाउँ आएको बाटो’, ‘घर ज्वाइँ’ प्रदर्शनमा आएका थिए । ‘दुखी आत्मा’, ‘अन्जिला’, ‘राजागञ्ज’, ‘पिताम्बर’, ‘भूठान’ प्रदर्शन तयारीमा छन् ।