७ महिनामा १ अर्ब माथिको व्यापार

नेपाली फिल्मको बक्स अफिस असोज र कात्तिक महिनामा आक्रामक देखियो । नेपाली फिल्मले नयाँ नयाँ रेकर्डहरु बनाए । यो बर्ष सकिन अझै ५ महिना बाँकी छ । तर, फिल्महरूको व्यापारले ७ महिनामै नयाँ नयाँ रेकर्ड बनिसकेका छन् । 

यो बर्ष संभवत नेपाली फिल्मको इतिहासमै सर्वाधिक कमाई हुने बर्षको रुपमा चिनिनेछ । यो बर्षको ७ महिनामै नेपाली फिल्मले १ अर्ब भन्दा माथिको व्यापार गरिसकेका छन् । 

निर्माताले दिएको व्यापारिक आँकडालाई मान्ने हो भने, असोज र कात्तिक महिनामा रिलिजमा आएका फिल्मको व्यापार नै ८० करोडको हारहारीमा छ । 

असोजको ३ गतेबाट रिलिजमा आएको फिल्म ‘खुस्मा’ले साढे ४ करोड हारहारीको ग्रस कलेक्शन गर्यो । असोजको १८ गतेबाट रिलिजमा आएको फिल्म ‘बेहुली फ्रम मेघौली’ले साढे २ करोड हारहारीको व्यापार गर्यो । 

दशैंमा रिलिजमा आएको फिल्म ‘छक्का पन्जा ५’ले २० करोड, ‘१२ गाउँ’ले २५ करोड ५० लाख, ‘ज्वाइँ साब’ साढे ३ करोड कमाइ गरे । तिहारमा रिलिजमा आएको फिल्म ‘पुर्ण बहादुरको सारङ्गी’ले २५ करोड माथिको व्यापार गरिसकेको छ । यो फिल्मले बक्स अफिसमा अझै १० करोड माथिको कमाई गर्ने प्रक्षेपण गर्न सकिन्छ । 

यसरीहेर्दा, नेपाली फिल्मले असोज र कात्तिक महिनामा मात्र ८० करोड माथिको व्यापार गरिसकेको छ । ‘ह्रस्व दीर्घ’ले पनि भोलिबाट सुखद कमाई गर्ने अपेक्षा गरिएको छ । 

यसअघि वैशाखदेखि भदौसम्म रिलिजमा आएका फिल्मको आँकडा हेर्ने हो भने पनि सुखद छ । वैशाखमा रिलिजमा आएको ‘बोक्सीको घर’ले १० करोडको व्यापार गर्यो ।

यी बाहेक ‘डिग्री माइला, मनसरा, पुजार सार्की, फर्की फर्की, गाउँ आएको बाटो, घर ज्वाइँ, रावायण, साम्बला’ लगायतको फिल्मको व्यापारलाई जोड्ने हो भने २० करोड भन्दा माथि छ । यसैले, ७ महिनामा नेपाली फिल्मले १ अर्ब भन्दा माथिको व्यापार गरेका छन् । यो नेपाली फिल्मका लागि खुशीको कुरा हो । 

रिलिजमा आउन लागेका फिल्महरूको लाइनअप पनि निकै राम्रो देखिएला यो बर्ष डेढ अर्ब भन्दा माथिको व्यापार नेपाली फिल्मले गर्ने देखिन्छ ।