‘वरिष्ठ बलराम’को काम अघि बढ्यो, मुख्य भूमिकामा दया र विजय

निर्माण हुने चर्चाका विच अन्यौलमा रहेको फिल्म ‘वरिष्ठ बलराम’को काम अगाडि बढेको छ । अब, यो फिल्मको निर्माण टिम र कलाकारमा भने नयाँ ट्विस्ट आएको छ । 

स्रोतले दिएको जानकारी अनुसार, यो फिल्मलाई अब सेभेन सिज फिल्मस्ले निर्माण गर्ने भएको छ । फिल्मलाई विनोद पौडेल र प्याट्रिक सुवेदीले निर्माण गर्दैछन् । यी दुई निर्माताले बनाएको फिल्म ‘पुर्ण बहादुरको सारङ्गी’ले अहिले बक्स अफिसमा बम्पर व्यापार गरिरहेको छ । 

फिल्मलाई सुरेन्द्र पौडेलले निर्देशन गर्दैछन् । यो फिल्ममा नायक दयाहाङ राई र कलाकार विजय बरालको मुख्य भूमिका रहने पक्का भएको छ ।

फिल्मको कथावस्तु पनि नयाँ तयार पारिएको स्रोतले जानकारी दिएको छ । यसअघि यो फिल्मलाई रोहित अधिकारीले निर्माण गर्ने तयारी गरिएको थियो । तर, कथा नै फाइनल हुन नसक्दा रोहित फिल्म निर्माणबाट पछि हटे । अब भने फिल्मलाई देशकै हिट फिल्म निर्माण कम्पनी सेभेन सिजले बनाउने पक्का भएको छ । 

फिल्ममा दया र विजय एक अर्काको दुस्मनको भूमिकामा देखिदैछन् । बक्स अफिसमा पनि दया र विजयका फिल्मले सर्वाधिक कमाउने फिल्मको रेकर्ड राखेका छन् । यस्तै, ‘कबड्डी’ सिरिजमा एकसाथ काम गरेपछि दया र विजयको केमेष्ट्री सर्वाधिक चर्चामा पनि छ ।