महोत्सवमा पलको ‘मायाबी’ प्रचार

नायक पल शाहको माग ‘महोत्सव’मा उच्च छ । उनी लामो समयदेखि महोत्सवमा दौडधूप गरिरहेका छन् । महोत्सवमा पल शाह पुग्दा हजारौं दर्शकको भीड हुन्छ । 

तर, नायक पल शाह अहिले महोत्सवमा आफ्नो भिडियोको मात्र होइन फिल्म ‘मायाबी’को प्रचारमा पनि व्यस्त छन् । बेनीमा पुगेर फिल्मको दोस्रो गीत ‘टलटल’ सार्वजनिक गरेका पलले बारामा सोही गीतमा दर्शकसँग नृत्य गरे । 

पलले दर्शकलाई फिल्म हेर्नका लागि आग्रह समेत गरे । हजारौं दर्शकमाझ पलले फिल्मको गीतमा नाच्दा दर्शक पनि उत्साहित देखिएका थिए । नायक शाहले ‘मायाबी’ एउटा विशुद्ध प्रेमकथा र मित्रताको कथामा बनेको  फिल्म भन्दै दर्शकलाई हेर्न आग्रह गरेका थिए । 

फिल्मको दोस्रो गीत ‘टलटल’लाई दर्शकहरुले रुचाइरहेका छन् । यसैले, अहिले महोत्सवमा यो गीतको पनि माग बढेको पलको भनाई छ । 

दिवाकर भट्टराईको निर्देशनमा तयार भएको यो फिल्म फागुनको १४ गतेबाट रिलिजमा आउँदैछ । फिल्ममा पलको साथमा दीपिका प्रसाँई, सुशील सिटौला, प्रशान्त ताम्राकार, करिश्मा श्रेष्ठ, नव–नायक समिम खान लगायतका कलाकारहरूको अभिनय छ । 

दर्शकले लामो समयदेखि एक विशुद्ध प्रेमकथामा बनेको फिल्म हेर्न नपाइरहेको समयमा ‘मायाबी’ रोजाइमा पर्ने विश्वास निर्माणपक्षको छ ।