करिश्माले किन भनिन्–‘जय बालेन ?’

नायिका करिश्मा मानन्धर अभिनीत फिल्म ‘बगान’ शुक्रबारदेखि हलमा रिलिज भइरहेको छ । फिल्मको सुरुवाती व्यापार सुखद छैन । तर, पनि यो फिल्मको निर्माणपक्षले फिल्मको प्रचार गर्न छाडेको छैन । फिल्मको विभिन्न शोजहरु आयोजना भइरहेका छन् । 

यसैबिच, यो फिल्मको प्रचारका क्रममा काठमाडौं महानगरका भित्ताहरुमा पोस्टर टाँसेको भन्दै निर्मातालाई महानगरपालिकाले ५० हजार जरिवाना तिराएको थियो । मंगलबार केही आक्रोशित देखिएको फिल्मको टिम बुधबार भने खुशी देखिएको छ । 

फिल्मकी नायिका करिश्मा मानन्धरले ५० हजार रूपैयाँ जरिवाना तिराएर फिल्मको लाखौँको प्रचार गरिदिएको भन्दै महानगरका मेयर बालेन शाहलाई धन्यवाद दिएकी छिन् । 

उनले लेखेकी छिन्–‘महानगरले हामीलाई ५० हजारको जरिवाना तिराएर ५ लाखको विज्ञापन गरिदियो । कसले भन्छ बालेन जी नेपाली फिल्मलाई माया गर्नुहुन्न भनेर ? जय बालेन ।’

यो फिल्ममा करिश्माले एकल महिलाको भूमिका निर्वाह गरेकी छिन् । एकल महिलाले बिबाह गर्नुपर्छ भन्ने कथामा यो फिल्म तयार भएको छ ।