हटाइयो कार्टुन क्रुको 'अन्तिम यात्रा'

डान्सर ग्रुप कार्टुन क्रूले निर्माण गरेको वेब–सिरिज ‘अन्तिम यात्रा : द लास्ट ट्रिप’लाई युट्युबबाट हटाइएको छ । छायाङ्कन भएको लोकेसनका व्यक्तिहरूको विरोधपछि भिडियो हटाइएको निर्माता सरोज अधिकारीले बताएका छन् ।

कार्टुन क्रूको युट्युब च्यानलबाट भिडियो सन्देश जारी गर्दै उनले सिरिजका कतिपय दृश्य र संवादले स्थानीयलाई पर्न गएको असर प्रति माफी मागेका छन् । अधिकारीका अनुसार काठमाडौँको एक कलेजमा छायाङ्कन गरिएको यो सिरिजका केही दृश्य र संवादप्रति कलेजले नै विरोध गरेको थियो । विवादित कुरा हटाएर केही दिनमा सिरिज पुनः दर्शकमाझ आउने जनाइएको छ ।

मुलुककै पहिलो जम्बी सिरिजको रूपमा चर्चा गरिएको सिरिजको पहिलो भाग गत शनिवार स्ट्रिमिङ भएको थियो ।