प्रिमियरमा रुचाइयो 'बगान': फिल्म मात्र नभई 'क्रान्ति' भएको प्रतिक्रिया

आउँदाे शुक्रबार अर्थात् २९ असारमा रिलिज हुने नेपाली फिल्म'बगान'को काठमाडौँमा प्रिमियर भएको छ । बुधवार साँझ भएको प्रिमियरमा कलाकर्मी, शुभचिन्तक र राजनीतिज्ञहरूको बाक्लो उपस्थिति थियो ।

फिल्म हेर्न उपसभामुख इन्दिरा राना, निर्देशकहरु लक्ष्मीनाथ शर्मा, नरेश पौडेल, ज्ञानेन्द्र देउजा, नवल नेपाल, शोभित बस्नेत, ऋषि लामिछाने, अभिनेताहरू कृष्ण मल्ल, अशोक शर्मा, रमेश उप्रेती, मुकुन भुषाल, गायकहरू विकास राणा, सत्यराज आचार्य, स्वरुपराज आचार्य, गायिका देविका बन्दना, सुनिता दुलाल, अभिनेत्री तथा निर्देशक दीपाश्री निरौला, नेपाल सरकारका पूर्वसचिव भीम उपाध्याय, लेखकहरु प्रदिप भारद्वाज,कोशी प्रदेश सभा सदस्य मीना श्रेष्ठ लगायतको उपस्थिती रहेको थियो । 

फिल्म हेर्ने अधिकांशले केहि दृश्य र संवादले भावुक बनाएको प्रतिक्रिया दिए भने यसै फिल्मबाट फिल्म क्षेत्रमा प्रवेश गरेकी प्रमिला कार्कीको अभिनयको तारिफ गरे । सधैँ चुलबुले भूमिकामा अभिनयमा देखिने करिश्मा मानन्धरले गम्भीर भूमिकामा अभिनय गरेको अब्बल अभिनेत्री प्रमाणित गरेको भन्दै प्रतिक्रिया दिएका छन् । 

फिल्म हेरिसकेपछि उपसभामुख इन्दिरा रानाले छोराछोरीले 'बगान'बाट धेरै कुरा सिक्न सक्ने बताइन् । 'फिल्ममा छोरीले आमाको लागि जे गरेकी छन्, त्यहि काम छोराले पनि गर्न सक्यो भने समाज परिवर्तन हुन्छ । फिल्म दिएको यो संदेश सशक्त छ', उपसभामुख रानाले भनिन् । 

अभिनेत्री तथा निर्देशक दीपाश्री निरौलाले यो फिल्म मात्र नभई क्रान्ति भएको प्रतिक्रिया दिईन् । 'यस्तो प्रकारको बिषयवस्तु उठाउनलाई ठुलै मुटु चाहिन्छ । सरोज खनाल जस्तो अभिनेता हुनुहुन्छ, त्यस्तै अब्बल निर्देशन गर्नुभएको छ', दीपाले भनिन् । उनले 'बगान'का प्रत्येक संवादका शब्द शब्दले मुटु छोएको बताइन् ।

अभिनेता रमेश उप्रेतीले फिल्मले रुवाएको बताए । 'म पुरुष हुँ, कम रुन्छु । म यत्तिकै पक्कै रोईन होला । 'बगान' हेर्दा तपाईंको आँखामा पक्कै रसाउने छन् । पर्दाको विषय तपाइको आँखा हुँदै मनसम्म पुग्छ', अभिनेता उप्रेतीले भने । 

गायिकाद्वय देविका बन्दना र सुनिता दुलालले निर्देशक सरोज खनाल, अभिनेत्री करिश्मा मानन्धर, नवनायिका कार्कीसहित सबै कलाकारको खुलेर तारिफ गरे । उनिहरुले समाजमा एकल आमाले बाँच्न पाउने अधिकार भएको तर निकै चुनौती रहेको बताउँदै फिल्मले त्यसलाई उजागर गरेकोमा प्रशन्न देखिए । 

निर्देशकद्वय ज्ञानेन्द्र देउजा र नरेश पौडेलले यो फिल्मले गहन विषयको उठान गरेको बताए । समाजलाई नयाँ मोड दिन सक्ने यो फिल्मलाई राज्यले पनि साथ दिनुपर्ने बताउँदै पुरुष निर्देशकले महिलाको कथालाई समाज परिवर्तन हुनुपर्‍यो भन्ने उद्देश्यसहित बनाएकोमा निकै खुशी लागेको उनिहरुले बताए । 

अभिनेत्री मानन्धरले पहिलोपटक पुरा फिल्म हेरेपछि आत्मसन्तुष्टि मिलेको बताईन् । उनले भनिन्,'एक कलाकारलाई आफ्नो काम मन पर्दैन, तर 'बगान' हेर्दा म सन्तुष्ट भएँ ।' निर्देशक तथा अभिनेता खनालले फिल्म हेरेर प्रतिक्रिया दिने सबैलाई धन्यवाद दिँदै अब दर्शकको हातमा फिल्म जिम्मा लगाएको बताए । अभिनेत्री कार्कीले आफुले आफुलाई पर्दामा दर्शकसँग बसेर हेर्नु निकै गाह्रो रहेको महशुस गरेको बताईन् । कार्कीले भनिन्,'प्रिमियरमा प्राप्त प्रतिक्रियाबाट म नयाँ आउँदै गरेको कलाकारको हिसाबले उर्जा प्राप्त भएको छ ।'

निर्माता तथा गीतकार सुरेश वाग्लेले दर्शकलाई फिल्म कस्तो लाग्छ त्यो प्रमुख रहेको बताउँदै आफुले यस फिल्ममा राम्रो गीत लेखेछु जस्तो पनि लागेको बताए । यो फिल्मले देशभरनै एकल आमाहरूलाई निशुल्क फिल्म देखाउने घोषणा गरिसकेको छ । यसमा आकाश श्रेष्ठ, नीर शाह, बसुन्धरा भुषाल र मिथिला शर्मा लगायतको अभिनय रहेको छ । 

स्वप्निल नीरवको कथामा आधारित रहि बनेको यो फिल्मबाट अभिनेता खनालले निर्देशनमा र अभिनेत्री कार्कीले अभिनयमा डेब्यु गरेकी हुन् । नेपाली वेबसाइट डटकमको प्रस्तुति रहेको ‘बगान’का निर्माता सुरेश वाग्ले हुन् भने  कार्यकारी निर्माता विनोद मानन्धर हुन् । यसमा गौरीशंकर धुजुको डिओपी, उत्सव दाहाल र नारायण जिसीको छायांकन, सन्देश शाहको सम्पादन, समिर मियाँको भि.एफ.एक्स. तथा रेनिश फागोको कलर करेक्शन रहेको छ । ब्याकराउन्ड स्कोर सुजिल कर्माचार्य र साउन्ड मिक्सिंग मुकेश शाहको रहेको छ । हरि लम्साल र सुवास भुषालको संगीत रहेको फिल्मका गीतमा अञ्जु पन्त, सुगम पोखरेल र अस्मिता अधिकारीको स्वर रहेको छ । 'बगान'को वितरण रिच इन्टरटेन्मेन्ट र डिसिएनले काठमाडौँ उपत्यका र मोफसलमा एफडी कम्पनीले गर्दैछ ।