सुदूरपश्चिममा सुन्दरी प्रतियोगिता

‘एक्सपर्ट मिस फारवेष्ट नेपाल’  प्रतियोगिता कैलालीको धनगढीमा हुने भएको छ । आयोजक रोयल कोल्याबोरेटिभ्स् प्रालि धनगढीले बुधवार पत्रकार सम्मेलन गरी सुदूरपश्चिमको कला, संस्कृति, पर्यटन, भेषभूषाको प्रवर्द्धन गर्ने उद्देश्यले मिस फारवेष्ट प्रतियोगिताको आयोजना गर्न लागेको जानकारी दिएको छ ।

प्रतियोगितामा १६ देखि २५ वर्षसम्मकाले मात्रै सहभागिता जनाउन पाउने आयोजक संस्थाका अध्यक्ष देवेन्द्र जोशीले जानकारी दिए । उनले असोज २० गते हुने प्रतियोगिताका लागि भदौ ७ देखि १० गतेसम्म कैलालीको टीकापुर, अत्तरिया, धनगढी र कञ्चनपुरको महेन्द्रनगरमा अडिसन गर्ने बताए । प्रतियोगितामा सहभागी भएकालाई भदौ २० देखि असोज १९ गतेसम्म एक महिनाको तालिम प्रदान गरिने जोशीले जानकारी दिए ।

प्रतियोगितामा मिस फारवेष्टको ताज जित्नेलाई स्कुटरसहित विविध पुरस्कार प्रदान गरिने पत्रकार सम्मेलनमा जानकारी दिइएको छ । यसैगरी, फष्ट रनरअप र सेकेण्ड रनरअपलाई क्रमशः ५० हजार र २५ हजार रुपैयाँ प्रदान गर्ने जोशीले जानकारी दिए ।

उनले हरेक विधामा उत्कृष्ट हुनेलाई क्रमशः १० हजार र पाँच हजार रुपैयाँ पुरस्कार प्रदान गरिने बताए । प्रतियोगिताको निर्णायकमा पूर्वमिस नेपाल सुगारिका केसी, गायक कालीप्रसाद बास्कोटा, अन्नपूर्ण शर्मा, निर्देशक हेमराज बिसी, पूर्व ओलम्पीयन दीपक बिष्ट र कोरियोग्राफर निलम चन्द रहने जनाइएको छ । प्रतियोगिता सम्पन्न गर्न करिब २५ देखि ३० लाख रुपिया बजेट खर्च हुने आयोजकले जानकारी दिएको छ ।