सुरु भयो ‘सिङ्गिङ स्टार नेपाल'

गायन रियालिटी शो ‘सिङ्गिङ स्टार नेपाल सिजन १’को प्रसारण शनिबारेदेखि सुरु भएको छ । यो शो दर्शकले प्रत्येक साताको शनिवार र आइतबार राती ९ बजे प्राइम टाइम टिभीमा हेर्न पाउनेछन् ।

नेपालको मौलिकतालाई प्रवर्द्धन गर्ने उद्देश्यले निर्माण गरेको शो रिल्स इन्टरटेनमेन्टले ल्याएको हो । शोमा जजको भूमिकामा गायिका त्रिशला गुरुङ, सङ्गीतकार अर्जुन पोखरेल र गायक सनुप पौडेल छन् । जजमध्येका एक पोखरेलले चल्तीका शोमा भन्दा केही नियम यसमा भिन्न रहेको बताए ।

उनले भने, ‘कतिपय रियालिटी शोमा गायन क्षमता भएता पनि भोटिङका कारण प्रतियोगी बाहिरिनुपर्ने हुन्छ । तर, अन्तिम १४ मा रहेका प्रतियोगीको गायन क्षमता हेरेर भोटिङका कारण प्रतियोगिताबाट बाहिरिए पनि हामी गीत निकाल्ने अवसरको सिर्जना गर्नेछौँ । यस कारण पनि अन्य भन्दा यो प्रतियोगिता फरक छ ।’

कार्यक्रमको प्रोजेक्ट हेड र निर्देशक प्रमोदकुमार भण्डारी र निर्माता टोलीमा शिखर गौतम, बुद्धि प्रसाद ढुङ्गाना, र नभराज चौलागाईं छन् । कार्यक्रमको सञ्चालन नम्रता श्रेष्ठ र विशाल पोखरेलले गर्नेछन् ।