चैत ६गतेबाट निटफेस्ट

मण्डला थिएटरको आयोजनामा नेपाल अन्तर्राष्ट्रिय नाट्य महोत्सव (निटफेस्ट) चैत ६ गतेदेखि आयोजना हुने भएको छ । चैत १४ गते पर्ने विश्व रङ्गमञ्च दिवससम्म फेस्टिभल आयोजना हुनेछ ।

‘सामाजिक रूपान्तरणका लागि रङ्गमञ्च : रैथाने ज्ञानको उज्यालो’ भन्ने नारासहित निटफेस्टको तेस्रो संस्करण आयोजना हुन लागेको महोत्सव संयोजक केदार श्रेष्ठले जारी गरेको विज्ञप्तिमा उल्लेख छ । महोत्सवमा अभिनेता दयाहाङ राई निर्देशकको रूपमा रहने छन् । 

यस पटकको निटफेस्ट मण्डला थिएटरसँगै काठमाडौँ बाहिरका विभिन्न स्थानमा आयोजना हुने जनाइएको छ । महोत्सवका लागि गत जुनमा नाटक तथा कार्यक्रमका लागि आवेदन आह्वान गरिएको थियो । महोत्सवको कार्यक्रम र छनोट भएका नाटकको लाइन अप चाँडै सार्वजनिक हुने जनाइएको छ ।