विकास बोर्डका कर्मचारीले दुःख दिएको भन्दै निर्माता आक्रोशित

चलचित्र विकास बोर्डका कर्मचारीले दुःख दिएको भन्दै निर्माता रोहित अधिकारी आक्रोशित बनेका छन् । उनले, सामाजिक संजालमा स्टाटस लेख्दै बोर्डका कर्मचारीहरूले निर्माताको काम ढिला सुस्ती गरेको भन्दै आक्रोश पोखेका हुन् । 

उनले सामाजिक संजालमा लेखेका छन्–‘चलचित्र विकास बोर्डका कर्मचारी हिजोदेखि सबै काम छाडेर गायब । स सानो काम गर्न पनि यो भएन उ भएन, सर हुनुहुन्न । यहाँका कर्मचारीहरूको के पारा हो ? सबै जना करारमा रहेछन्, सबैलाई हटाउनुपर्छ तुरुन्त । खासमा यो विकास बोर्डको काम त छैन । विकास बोर्ड खारेज गरिनुपर्छ ।’

निर्माता अधिकारीले आफू दुई दिनदेखि निर्माण तथा वितरण शाखामा काम भएर आएको तर काम गर्ने कर्मचारी नै गायब भएको मेरो फिल्मलाई बताए । उनले भने–‘यो शाखामा काम गर्ने रञ्जन अधिकारी गायब छन् । कर्मचारीहरू सर हुनुहुन्न भन्छन् । तर, आधा घण्टामा हुने काम दुई दिनसम्म पनि हुँदैन । अरु, निर्माताहरूले पनि विकास बोर्डमा दुःख पाउने गरेको गुनासो गरेको सुनिन्छ । यो विकास बोर्डको काम छैन ।’

चलचित्र विकास बोर्डमा अध्यक्ष दिनेश डीसी गएपछि सुशासनको प्रत्याभूति हुने अपेक्षा गरिएको थियो । तर, कर्मचारीहरूले नै काम नगरेको भन्दै निर्माताहरू गुनासो गर्न थालेका छन् ।