‘पिताम्बर’को टिजरमा आक्रामक भ्यूज, उत्कृष्ट प्रतिक्रिया

कृषा चौलागाइको निर्देशनमा तयार भएको फिल्म ‘पिताम्बर’को टिजरले दर्शकको उत्कृष्ट प्रतिक्रिया पाएको छ । साथै, यो फिल्मको टिजरलाई युट्युबमा पनि आक्रामक भ्यूज मिलिरहेको छ । सार्वजनिक भएको २४ घन्टा नपुग्दै १० लाख बढी भ्यूज पाएको टिजरलाई हालसम्म १५ लाख बढीले हेरिसकेका छन् । 

३१ हजार भन्दा बढी लाइक आएको टिजरमा २४ सय भन्दा बढी प्रतिक्रिया आएका छन् । अधिकांश दर्शकले फिल्मको टिजर हेरेपछि पहिलो दिन नै फिल्म हेर्न जाने प्रतिक्रिया दिएका छन् । 

दर्शकले नायक प्रदीप खड्काको एक्सन अवतारलाई निकै रुचाएका छन् । साथै, नायक सौगात मल्लको गेटअप र संवादलाई पनि दर्शकले रुचाएको देखिन्छ । 

मल्टिस्टारर यो फिल्मले चैत्र २९ गते बम्पर ओपनिङ गर्ने देखिएको छ । 

फिल्ममा दयाहाङ राई, आर्यन सिग्देल, अनुप विक्रम शाही, सुरक्षा पन्त, गौरी मल्ल, रवीन्द्र झा, प्रमोद अग्रहरी, कामेश्वर चौरासिया, दिव्य देव पन्त, दिव्या रायमाझी, गौरव बिष्ट लगायतका कलाकारहरुको अभिनय छ । 

दर्शकले यो वर्ष एक्सन फिल्मलाई पनि निकै साथ दिएको अवस्था छ । यस्तो अवस्थामा एक्सन र उत्कृष्ट मेकिङका कारण ‘पिताम्बर’ चर्चामा छ ।