‘ताण्डवम्’को फस्टलुक रिलिज, फागुन ९ देखि हलमा लाग्ने

फिल्म ‘ताण्डवम्’को फस्टलुक सार्वजनिक गरिएको छ । जुनिम गहतराजको निर्देशनमा तयार भएको यो फिल्मलाई फागुन ९ गतेबाट रिलिज गर्ने जानकारी पनि यसको निर्माणपक्षले दिएको छ । सार्वजनिक पोस्टरमा फिल्मका मुख्य कलाकारहरू आफ्नो क्यारेक्टर लुक्समा छन् ।

पोस्टरमा पुस्कर गुरुङ, प्रेम सुब्बा, सरिना मगर, अंकित खड्का, अनोज पाण्डे, जुनिम गहतराज, कमल कार्की र गोपाल कटुवालको अभिनय हेर्न सकिन्छ । महाशिवरात्रिको छेको पारेर प्रदर्शनमा आउन लागेको यो फिल्मको नाम जस्तै धार्मिक कनेक्शन पनि रहेको निर्माणपक्षले बताएको छ ।

एक नव विवाहित जोडी आफ्नो पहिलो सन्तानको प्रतीक्षामा रहेको समयमा उनीहरुको जीवनमा घट्ने अकल्पनीय घटनाले निम्त्याउने उतारचढावको कथामा यो फिल्म बनेको छ । फिल्मलाई थ्रिलर जनरामा निर्माण गरिएको छ । सिंहदेवी प्रोडक्सनको व्यानरमा निर्माण भएको फिल्ममा धनकुमारी गहतराज, सविना मगर र मनिष गौतमको लगानी छ ।

हरि घलेको छायांकन रहेको फिल्ममा सम्राट बस्नेतको एक्सन, सुशान्त गौतम र कोबिद बज्रको ब्याकग्राउण्ड म्युजिक, अनिरुद्ध आत्रेय र हुसेनको कथा, पटकथा तथा संवाद छ ।