नीताको मनमा उत्साह र डर

फिल्म ‘ह्रस्व दीर्घ’को ट्रेलर रिलिज कार्यक्रममा नायिका नीता ढुंगाना उत्साहित देखिइन् । साथै, उनको मनमा के होला भन्ने डर पनि पैदा भएको प्रष्ट झल्कन्थ्यो । 

उसो त, नीताले फिल्म ‘माया’ बनाउने तयारी गरेकी थिइन् । तर, यो फिल्मको काम अगाडि नबढेपछि नीता ‘ह्रस्व दीर्घ’ तिर लागिन् । 

नीताका अनुसार यो फिल्म ६ करोडको बजेटमा तयार भएको हो । फिल्मको ट्रेलर सार्वजनिक भएपछि यसको मेकिङको चर्चा खुबै छ । 

फिल्ममा कलाकारहरुको लाइनअप पनि लामो छ । दक्षिण भारतीय फिल्ममा नाम चलेका कलाकारहरूलाई यो फिल्ममा अभिनय गराइएको छ । 

फिल्म रिलिज हुन एक साता मात्र बाँकी रहँदा सार्वजनिक गरिएको ट्रेलर रिलिज कार्यक्रममा नीताको छटपटी प्रष्ट देखिन्थ्यो । नीता कहिले शान्त हुन्थिन् त कहिले उत्साहित देखिन्थिन् । 

यो फिल्मले लगानी मात्र सुरक्षित गर्न बक्स अफिसमा १२ करोड माथिको ग्रस कलेक्शन गर्नुपर्ने हुन्छ । उसो त, पछिल्लो समय रिलिजमा आएका केही नेपाली फिल्मले यो आँकडा खासै टाढा छैन भन्ने प्रष्ट पारिदिएका छन् । 

यसैले, नीता आशावादी छिन् । अर्कोतिर, भारतमा पनि यो फिल्म रिलिज हुने भएकाले हरिहर अधिकारी र नीता ढुंगानालाई लगानी उठाउन सहज हुने विश्वास छ ।