फिल्म स्टुडियो निर्माणका लागि बोर्डले गर्यो टेन्डरको आह्वान

चलचित्र विकास बोर्डले बनेपा नगरपालिकाको वडा नम्बर १० र १३ मा निर्माण गर्न लागेको इन्डोर सुटिङ स्टुडियोका लागि बोलपत्र आह्वान गरेको छ । बोर्डले सार्वजनिक गरेको सूचना अनुसार, आगामी ३० दिन भित्र इच्छुक कम्पनीहरूले ई–बिडिङमार्फत आवेदन दिन सक्नेछन् । 

बोर्ड अध्यक्ष दिनेश डीसीले भने–‘संभवत नेपालकै सबैभन्दा ठूलो आकारको इन्डोर सुटिङको रुपमा यो स्टुडियो निर्माण हुनेछ । निजी क्षेत्रसँग केही स्टुडियो भएपनि यस अघि फिल्म क्षेत्रसँग आफ्नो स्टुडियो थिएन ।’

यो परियोजनाले स्वदेशी फिल्म उद्योगलाई अत्याधुनिक प्रविधिसहित सहज ढंगको सुटिङ स्थल प्रदान गर्ने बोर्डको भनाई छ । बनेपाको ४२ रोपनी क्षेत्रफलमा निर्माण हुने यो स्टुडियोको निर्माण विगत केही बर्षदेखि योजनामा रहेपनि कार्यान्वयनमा जान सकेको थिएन । यो स्टुडियोको शिलान्यास २ महिनाभित्रै गर्ने योजनामा बोर्ड छ । यो स्टुडियोले नेपाली फिल्म उद्योगलाई गुणस्तरीय सुटिङ वातावरण प्रदान गर्ने विश्वास गरिएको छ ।