धमलाले सके  ‘द आउट ल दफा: २१९’ को डबिङ

ऋषि धमलाले अभिनय गरेको पछिल्लो फिल्म ‘द आउट ल दफा: २१९’ को काम सकेका छन् ।  रेट्रो ग्रुपको ब्यानरमा निर्माण भएको फिल्मको डबिङ भइरहेकोमा  शनिवार धमलाले आफ्नो भूमिका रहेको दृश्यको डबिङ सकेको जानकारी दिएका हुन् ।

फिल्ममा पत्रकारको भूमिकामा रहेका धमलाले आफ्नै कार्यक्रम 'जनता जान्न चाहन्छन्'को प्रस्तोताको रूपमा अभिनय गरेका छन् । सुशील श्रेष्ठको मुख्य भूमिका रहेको फिल्ममा धमला सँगै शिक्षा सङ्ग्रौला, नरेश पौडेल, सुमन भण्डारी, हेम गुरुङ, विशाल पहारी, महेश त्रिपाठीलगायतका कलाकारको मुख्य भूमिका रहेको छ । 

बिक्की महर्जनको लेखन तथा निर्देशन रहेको फिल्ममा अमित अग्रहरीको लगानी छ । विनोद कडायत कार्यकारी निर्माता रहेको फिल्मको सह–निर्माता विकाश चौधरी हुन् । चुल्ठे काजीको एक्सन रहेको फिल्म अशोक शर्माको डीसीएनले वितरण गर्दै छ । स्याडो पिक्चर्स तथा रेट्रो फिल्मस्को ब्यानर निर्माण भएको फिल्ममा नवीन गुरुङको छायाङ्कन र ट्रेलर मास्टर साहिल खानको सम्पादन रहेको छ ।