फिल्म ‘लाज शरणम’को टिजर सार्वजनिक

फिल्म ‘लाज शरणम’को टिजर सार्वजनिक भएको छ । टिजरले फिल्मको कथावस्तु र चरित्र चित्रणबारे प्रकाश पार्छ । टिजरको केन्द्रमा सीताराम कट्टेल ‘धुर्मुस’ छन् । साथै  फिल्मका सबै कलाकारको झलक देख्न पाइन्छ । 

उपल्लो डोल्पाको एक युवक विदेश जाने तयारीमा रहेको कथासहित टिजर सुरु हुन्छ । त्यसपछि कफिन देखाइएको छ र कफिनलाई केन्द्रमा राखेर कथा अघि बढ्छ । कफिनसँगै कथामा कौतुहलता र रोचक घुम्ती चित्रण गरिएको छ । वैदेशिक रोजगार र युवाको श्रम शक्तिको केन्द्रमा फिल्म निर्माण भएको बुझिन्छ । 

टिभी शृङ्खला ‘सक्किगो नि’ निर्माता कम्पनी जेपीटी क्रिएसनले निर्माण गरेको यो फिल्म शिवरात्रि अवसरमा १४ फागुनमा नेपालसहित अन्तर्राष्ट्रिय बजारमा एकसाथ प्रदर्शनमा आउँदै छ । सेभेन सिज इन्टरनेसनलले फिल्मलाई अन्तर्राष्ट्रिय बजारमा रिलिज गर्दै छ । कुमार कट्टेल ‘जिग्री ब्रो’ले निर्देशन गरेको फिल्ममा अर्जुन घिमिरे (पाँडे), सागर लम्साल (बले), हरिष निरौला (क्रकोज), प्रियाना आचार्य (मुन्नी)लगायत कलाकार पनि देखिनेछन् । यसबाहेक, मुकुन्द श्रेष्ठ, महेश त्रिपाठी, विजय बराल, अर्पण थापा, कमलमणि नेपाल, सीताराम कट्टेल ‘धुर्मुस’, रेणु योगी, विजय लामा, माला लिम्बुको पनि अभिनय छ ।

फिल्ममा नवीन श्रेष्ठ निर्माता, राम नरेश साह र सृजना खड्का सह-निर्माताको रूपमा छन् । सुदीप बरालले छायाङ्कन गरेका हुन् ।