दशैंमा फिल्म जुध्ने भएपछि स्टारमाथि भर पर्दै मेकर

आउँदो वर्षको दशैंमा कतिवटा फिल्म रिलिज हुन्छन् पक्का छैन । तर, धेरै निर्माताले दशैँलाई नै लक्षित गरेर प्रदर्शन मिति तोकिरहेका छन् । 
दशैंमा नाम चलेका व्यानरहरुले फिल्म रिलिज गर्न लागेपछि अधिकांश मेकर प्रतिस्पर्धामा उत्रिनका लागि लागिपरेका छन् । अधिकांशको ध्यान यतिबेला नाम चलेका स्टारमाथि छ । 

निर्माता रोहित अधिकारीले बनाउन लागेको फिल्म ‘माइतीघर’मा स्टारहरूको लाइनअप छ । यो फिल्ममा केदार घिमिरे, प्रकाश सपुत, धिरज मगर, उपासना सिंह ठकुरी जस्ता दर्शकले रुचाएका कलाकार छन् । 

रोहित एउटा शोज पाएपनि फिल्म रिलिज गर्ने अडानबाट पछि हटेका छैनन् । अब, नायक विराज भट्टले औपचारिक रुपमा घोषणा नगरेपनि ‘१२ गाउँ २’ पनि दशैंमा ल्याउने तयारी भएको वुझिएको छ । यो फिल्ममा नायक समीर भट्टले काम गर्ने पक्का छ । फिल्ममा विराज र समीर देखिएपनि त्यसले पार्ने प्रभाव पनि कम आँकलन गर्न मिल्दैन । 

निर्देशक तथा निर्माता अशोक शर्माले पनि फिल्म रिलिज गर्न लागेका छन् । यसका लागि उनले नायक दयाहाङ राई र नायिका मिरुना मगरमाथि बढी विश्वास गरेको पाइन्छ । फिल्म क्षेत्रमा यो जोडी सर्वाधिक रुचाइएको जोडी मानिन्छ । अशोकले अन्य कलाकारहरूलाई पनि फिल्ममा काम गराउनेछन् । 

यता, परिच्छेद सेनले नायक पल शाहको स्टारडममाथि विश्वास गरेको देखिन्छ । उनले, बनाउन लागेको फिल्म ‘महाराजधिराज’ पनि दशैंमा नै रिलिज गर्ने बताइएको छ । यो वर्षको दशैंमा फिल्मले बम्पर व्यापार गरेपछि धेरैको ध्यान लामो बिदामा परेको हो । बसन्त निरौलाले पनि ‘दशमी’ फिल्म दशैंमा ल्याउने बताएका छन् । यो फिल्मका लागि भने कलाकारहरू फाइनल गरिएको छैन । 

यसरीहेर्दा, अहिलेसम्म दशैंमा ५ वटा फिल्म आउने तयारीमा छन् । अब, अन्य केही मेकरले पनि नाम चलेका स्टारसहित दशैंमा फिल्मको घोषणा गर्न लागेको वुझिएको छ ।