‘फेरि रेशम फिलिली’का दुई पोस्टरले के भन्छ ?

फिल्म ‘फेरि रेशम फिलिली’को नयाँ पोस्टर सार्वजनिक गरिएको छ । निर्माणपक्षले ‘फेरि जालमा’ गीत रिलिजको एक दिन अगाडि अर्थपूर्ण दुई पोस्टर सार्वजनिक गरेको हो । सार्वजनिक दुई पोस्टरमा फिल्मका मुख्य तीन कलाकारहरू विनय श्रेष्ठ, कामेश्वर चौरासिया र सुपुष्पा भट्टलाई देख्न सकिन्छ ।

सार्वजनिक पोस्टरमा विनय हातमा पासपोर्ट बोकेर उभिएका छन् । यस्तै, सुपुष्पा भने आक्रोशपूर्ण शैलीमा हातमा बन्दुक बोकेर उभिएको देख्न सकिन्छ । यस्तै, कामेश्वरले भने दुई हात जोडेर माफी मागिरहेको देख्न सकिन्छ ।

साथै, पोस्टरमा नेपालको धरहरा र अमेरिकाको स्ट्याचु अफ लिबर्टी पनि देख्न सकिन्छ । यसैले, यो फिल्मले पनि वैदेशिक रोजगारीको कथालाई उठान गर्ने वुझ्न सकिन्छ । निरज महर्जनले निर्देशन गरेको यो फिल्ममा नीर शाह, प्रकाश घिमिरे, शिशिर वाङ्देल, रविन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, सजन थापा लगायतका कलाकारहरुको अभिनय छ । 

सुशन प्रजापतिको छायांकन रहेको फिल्ममा निर्देशक महर्जन र आकाश बरालको पटकथा, नरेश किङ्ग योगीको एक्सन, कालीप्रसाद बाँस्कोटा, एसडी योगी, हर्क साउद, जयन जे वाइवा, दीपक शर्माको संगीत, सुरेन्द्र पौडेलको सम्पादन छ ।

सिनेमा आर्ट र वि मोसन पिक्चर्सको सहकार्यमा निर्माण भएको फिल्ममा रौनक विक्रम कँडेलको लगानी छ । सुरज बम ठकुरी कार्यकारी निर्माता रहेको फिल्ममा एनी थापा सह–निर्माताको रुपमा छिन् ।