‘एक्टर’ प्रिमियरमा प्रदीप, आना र दिव्याको चर्चा

भोलि बुधबारदेखि रिलिजमा आउन लागेको फिल्म ‘एक्टर’को भक्तपुरमा प्रिमियर गरिएको छ । नेपाली फिल्म क्षेत्रका फिल्मीकर्मी, पत्रकार र विभिन्न क्षेत्रका व्यक्तिहरूको बाक्लो उपस्थितिमा यो फिल्मको प्रिमियर गरिएको हो । करिब ७ सय जना व्यक्तिहरू प्रिमियरमा उपस्थित रहेको निर्माणपक्षले बताएको छ । 

फिल्मको प्रिमियरमा मुख्य कलाकारहरू प्रदीप खड्का, आना शर्मा, दिव्या रायमाझी र राजवल्लभ कोइराला पुगेका थिए । उनीहरुको पहिरनले उपस्थित पाहुनाहरूको ध्यान खिचेको थियो । 

प्रिमियरमा फिल्म हेरेका अधिकांशले यसको विषयवस्तु, प्रस्तुतिमा नयाँपन र कलाकारको अभिनयको तारिफ गरेका थिए । फिल्मका निर्देशक राजन भुसाल प्रिमियरमा प्राप्त प्रतिक्रियाबाट आफू उत्साहित भएको बताउँछन् । डेब्यू फिल्मबाटै भुसालको तारिफ भइरहेको छ । फिल्मको स्क्रिप्ट आकाश बराल र राजन भुसालले मिलेर लेखेका हुन् । अधृत फिल्मस् र अ मोती फिल्मस्को संयुक्त प्रस्तुतिमा रहेको यो फिल्ममा थमन कुमार भण्डारीको लगानी छ । क्रियटिभ निर्माता मोती कार्की रहेको फिल्ममा अनिश भुसाल सह–निर्माताको रुपमा छन् । 

प्रिमियरमा फिल्मको छायांकनपक्ष र प्राविधिक पाटोको पनि तारिफ भएको थियो । ‘एक्टर’ बन्ने सपना बोकेको एक युवकको जीवनमा आइपर्ने विभिन्न उतारचढावको कथामा यो फिल्म बनेको छ ।