सुजन युएईमा गुन्जिँदै

गायक सुजन चापागाईँले आगामी जेठ १८मा युएईको दुबईमा लाइभ ब्यान्डसहित प्रस्तुति दिने भएका छन् । आयोजक निपफिल्म्सले सोमबार सुजनको कन्सर्ट मिति घोषणा गर्दै दुबईको अल–नासार लिजरल्याण्डमा प्रस्तुति दिने तय भएको जनाएको छ ।

पछिल्लो समय रुचाइएका गायक सुजनको यो दोस्रो अन्तर्राष्ट्रिय टुर हुनेछ । सन् २०२३ को सुरुवातमा उनी अस्ट्रेलियामा गुन्जिएका थिए । मध्यपूर्वमा पहिलो पटक गुन्जिन लागेका उनले चाँडै अमेरिकामा पनि प्रस्तुति दिने तयारी छ ।

निपफिल्म्सले टिम पालाजसँगको सहकार्यमा दुबईमा कन्सर्ट गर्न लागेको हो । उनको अघिल्लो गीत ‘एक्लै भए नि मेरो प्रेम’ निकै रुचाइएको थियो । कोभिड महामारीताका सार्वजनिक भएको गीत ‘तीनपाते’बाट सुजन नेपाली साङ्गीतिक क्षेत्रमा चिनिएका हुन् ।