फेरि रेसम फिलिलीको ‘ग्रिन कार्डैमा' सार्वजनिक

 विनय श्रेष्ठ स्टारर कमेडी सोसल ड्रामा ‘फेरि रेसम फिलिली’को नयाँ गीत रिलिज भएको छ । ‘ग्रिन कार्डैमा’ बोलको गीतमा फिल्मका केही महत्त्वपूर्ण दृश्य पनि समावेश छन् । दीपक शर्माको शब्द र सङ्गीत रहेको गीतमा डेभिड शङ्करको गायन छ ।

गीतमा शीर्ष कलाकार विनय र सुपुष्पा भट्टसहित नीर शाह, कामेश्वर चौरासिया र कमेडियन मेक्सम गौडेल फिचर्ड छन् । गाउँको सेटिङमा खिचिएको गीतले गाउँमा अमेरिकी सपना कसरी मौलाएको छ भन्न दर्साउँछ । फिल्ममा प्रकाश घिमिरे, शिशिर वाङ्गदेल, रवीन्द्र झा, लक्ष्मी गिरी, महेश त्रिपाठी, एवनराज उप्रेती, सजन थापाको पनि अभिनय छ ।

फिल्मलाई निरोज महर्जनले लेखन, निर्देशन गरेका हुन् । रौनकविक्रम कँडेल निर्माता हुन् । एनी थापा सह निर्मात्री हुन् । कार्यकारी निर्माता सुरज बम हुन् । सिनेमा आर्ट र भी मोसन पिक्चर्सको ब्यानरमा फिल्म बनेको हो ।

सुसन प्रजापतिको छायाङ्कन, निर्देशक महर्जन र आकाश बरालको पटकथा, नरेश किङ्ग योगीको द्वन्द्व निर्देशन, कालीप्रसाद बाँस्कोटा, एसडी योगी, हर्क साउद, जयन जे वाइवा र दीपक शर्माको सङ्गीत र सुरेन्द्र पौडेलको सम्पादन छ । फिल्मलाई गोविन्द शाहीको काफिया फिल्मस् र कुवेर सिने डिष्ट्रीव्युसनले वितरण गर्दैछन् ।

‘फेरि रेसम फिलिली’ १४ फागुनमा प्रदर्शन हुनेछ ।