‘महाराजधिराज’को फस्टलुकमा पलको न्यूड गेटअप

फिल्म ‘महाराजधिराज’को फस्टलुक सार्वजनिक भएको छ । छत्रेश्वरी म्यानेजमेन्ट प्रा.लिको प्रस्तुति रहेको यो फिल्मले फस्टलुकले दर्शकमाझ उत्सुकता जगाउने देखिन्छ । फिल्मको स्लोगन ‘अनेकौं समस्या म देख्छु जगतमा, छ कि दोष हाम्रो आफ्नै रगतमा’ भनेर राखिएको छ । यसले पनि फिल्मको बिषयमा केही अर्थ राख्छ । 

फिल्मको पोस्टरमा दुई जना कलाकारलाई स्थान दिइएको छ । एकजना राजर्षी पहिरनमा रहेको देखिन्छन् भने अर्को एक व्यक्ति न्यूड देखिएका छन् । न्यूड व्यक्ति कुर्सीमा बसेका छन् र शारीरिक रुपमा निकै कमजोर पनि देखिन्छन् । यो तस्विर भित्तामा फ्रेममा राखिएको जस्तो देखिन्छ । यसले आफ्ना सन्तानको संझनामा पछिल्लो पुस्ताले फ्रेमिङ गरेका हुन् कि भन्ने अनुमान लगाउन सकिन्छ । यो फस्टलुकले दर्शकमा कौतुहलता जगाउने अपेक्षा गरिएको छ ।

फस्टलुकमा नायक पल शाहलाई कमजोर मानिसको गेटअपमा देखाइएको छ । यसले, पल केही भिन्न अवतारमा फिल्ममा देखिदैछन् कि भन्ने अड्कल लगाउन सकिन्छ ।  

फिल्मको प्रदर्शन मिति आउँदो बर्षको दशैंको फूलपातिलाई तोकिएको छ । परिच्छेद सेनले निर्देशन गर्ने फिल्मको कथा पनि स्वयंम उनले नै लेखेका हुन् । विराज विष्टको प्रस्तुतिमा तयार हुन लागेको फिल्ममा टोपेन्द्र बिष्ट, चक्र बहादुर केसी र रवि खड्काको लगानी छ ।