‘तेल भिसा’ले मनायो ५१ दिन

मंसिरको ७ गतेबाट रिलिजमा आएको फिल्म ‘तेल भिसा’ले आज ५१ दिन पुरा गरेको छ । यो बर्ष ५१ दिन पुरा गर्ने ‘तेल भिसा’ पाँचौ फिल्म हो । यसअघि ‘बोक्सीको घर, घर ज्वाइँ, १२ गाउँ, पूर्ण बहादुरको सारङ्गी’ले ५१ दिन पार गरेका थिए । 

विभिन्न बाधा अड्चन पार गर्दै यहाँसम्म आइपुगेको भन्दै फिल्मका निर्देशक शंकर घिमिरे र नायिका तथा निर्मात्री ऋचा घिमिरेले दर्शकलाई धन्यवाद दिएका छन् । यो फिल्मले क्यूएफएक्स, एफक्यूब, रञ्जना सिनेप्लेक्स, बीएसआर मुभिज, वान सिनेमाज्, डीम्याक्स सिनेमाज्, फ्रेन्ड्स सिनेमाज्, सिने रोयल लगायतका हलमा ५१ दिन मनाएको हो । 


दक्षिण भारतीय फिल्म ‘पुष्पा २’ रिलिज हुँदा यसको शोजहरु खुम्चिएको थियो । तर, पछि साउथ फिल्मको क्रेज कम हुँदै गएपछि नेपाली फिल्म ‘तेल भिसा’को शोज बढेको थियो । यो फिल्ममा विपिन कार्की, वर्षा राउत, पुजा चन्द, ऋचा घिमिरे, वुद्दि तामाङ, सुचित्रा उप्रेती लगायतका कलाकारहरुको अभिनय छ ।

यो फिल्ममा सुशन प्रजापतिको छायांकन, रामजी लामिछाने र शिशिर खातीको कोरियोग्राफी, आशिष अविरल, कल्याण सिंह र कृष्ण भारद्वाजको संगीत, अजय खड्काको सम्पादन छ । 

निर्माणपक्षले नेपालबाट फिल्मले कति कमायो भन्ने खुलाएको छैन ।