‘कार्साङ्’को बुकिङ खुल्यो, कस्तो होला ओपनिङ ?

मङसिरदेखि नेपाली फिल्मको बक्स अफिस सुस्ताएको छ । पौष महिनामा रिलिजमा आएका दुई फिल्म ‘बमबहादुर र देववाणी’को व्यापार निकै नै कमजोर भयो । हलमा दर्शक नआएको अवस्थामा अब कुन फिल्मले चहलपहल बढाउला भन्ने चासो सबैलाई छ ।

यसैबिच, शुक्रबारदेखि रिलिजमा आउन लागेको फिल्म ‘कार्साङ्’को बूकिङ खुलेको छ । यम शेर्पाको निर्देशनमा तयार भएको यो फिल्मलाई देशभरका मल्टिप्लेक्सले सुखद शोज दिएका छन् । अझै, केही नाम चलेका मल्टिप्लेक्सहरुले यो फिल्मको शोज खुलाइसकेका छैनन् ।

दक्षिण भारतीय फिल्म ‘गेम चेन्जर’का कारण पनि यो फिल्मको पूर्ण शोज सार्वजनिक नभएको हुनुपर्छ । 

यो फिल्मको देशकै ठूलो चेन क्यूएफएक्स, एफक्यूब लगायतमा शोज खुलेको छ । फिल्मले सुखद ओपनिङ गरेको खण्डमा शोज अझै बढ्ने देखिन्छ ।

लामो समयदेखि हलमा दर्शक तान्न सक्ने खालका फिल्म आएका छैनन् । यहीकारणले पनि दयाहाङ राई, जितु नेपाल, दिया मास्के जस्ता कलाकारहरू रहेको फिल्मप्रति प्रदर्शकको आशा बढेको हुनुपर्छ । यो फिल्मले शेर्पा समुदायको कथा भन्छ । फिल्मको टिजर र ट्रेलरले दर्शकको उत्साह बढाएको छ ।