हरर कमेडी फिल्म ‘फिरफिरे फिरिरी’को ट्रेलर सार्वजनिक

हरर कमेडी फिल्म ‘फिरफिरे फिरिरी’को ट्रेलर सार्वजनिक भएको छ। ३ मिनेट लामो ट्रेलरले गाउँघरमै बसेर पेसा व्यवसाय अँगालेका ४ युवकको जीवनमा अपरिचित युवतीको आगमनपछि उत्पन्न परिस्थितिलाई हास्य शैलीमा प्रस्तुत गरेको छ । ट्रेलर हेर्दा फिल्मले हररमा पनि नयाँ स्वाद दिने अनुमान गर्न सकिन्छ । माघ ४ गतेदेखि प्रदर्शनमा आउने फिल्मलाई नवीन भट्टले निर्देशन गरेका हुन्। 

फिल्ममा सन्दीप श्रेष्ठ, भावना उप्रेती, रविना केसी, पिटर प्रिन्स, मनोजकुमार अधिकारी, शङ्कर सेढाई, सूर्यमान लिम्बू, पुष्प अवस्थी लगायतको अभिनय छ। निर्देशक भट्ट र सन्दीप श्रेष्ठले फिल्मको पटकथा मिलेर लेखेका हुन्। ‘आज साइकल, भोलि फरारी’ ट्याग लाइन दिइएको फिल्मले दर्शकलाई नयाँ स्वाद दिने छनक ट्रेलरले देखाउँछ।

मनोजकुमार अधिकारी फिल्मका निर्माता हुन् । जितु तामाङको छायाङ्कन, केशवराज भट्टको नृत्य, प्रशान्त सिवाकोटीको सङ्गीत र अनन्त घिमिरेको सम्पादन रहेको फिल्म विन्ध्यवासिनी क्रियसनको ब्यानरमा निर्माण भएको हो ।