हिन्दू धर्मको विरोध गर्यो भन्ने आरोपको मह जोडीले गरे खण्डन

चर्चित हाँस्य कलाकार जोडी मदनकृष्ण श्रेष्ठ र हरिवंश आचार्यले अमेरिकी अन्तराष्ट्रिय विकास नियोग (युएसएआइडी)बाट पैसा लिएर हिन्दू धर्म विरोधी प्रचार गरेको आरोप लागेपछि त्यसको खण्डन गरेका छन् । सामाजिक संजालमा आज एक भिडियो सार्वजनिक गर्दै यी दुईले गलत हल्लाको पछि नलाग्ने आग्रह गरेका हुन् । 

भिडियोमा मदनकृष्ण र हरिवंशले यस्ता गलत हल्लाले आफूहरूको चित्त दुखेको उल्लेख गरेका छन् । 

भिडियोमा मदनकृष्णले भने–‘हिजोआज सामाजिक संजालमा मह जोडीले यूएसआइडीबाट पैसा लिएर धर्मको विरोध गर्दै हिँड्यो भन्ने जुन किसिमको अनर्गल प्रचार भइरहेको छ, त्यसले हाम्रो एकदमै चित्त दुखेको छ । हामी सबैलाई आफ्नो हितैषी सम्झन्छौं । आफ्नै हितैषीबाट यस्तो कुरा सुन्दा चित्त दुखेको छ ।’

उनले, आफूहरूले राम्रा कुरा मात्र छानेर प्रचार गरेको पनि स्पष्ट पारेका छन् । यस्तै, कलाकार हरिवंश आचार्यले पनि कुनै सिरियलबाट आफूहरूले हिन्दू धर्म वा अन्य धर्मको विरोध नगरेको बताएका छन् । उनले भने–‘हामीले मदनबहादुर हरिबहादुर, असल लोग्ने, आमा, विभिन्न किसिमका खोपका कार्यक्रमहरू गरेका छौं । र त्यो हामीले युट्युबमा छर्लङ हुने गरि राखेका छौं । त्यो एकपटक हेर्न म आग्रह गर्न चाहन्छु । हामीले कहीँ कतै पनि सनातन हिन्दू धर्म र अन्य कुनै पनि धर्मको विरोध गरेका छैनौं । र अर्को धर्म लिनुपर्छ भनेर उकासेका पनि छैनौं । यो अनर्गल प्रचार हो ।’

हरिवंशले ‘पञ्चायत व्यवस्थाको सराध्य’ कार्यक्रममा हिन्दु धर्मप्रति नभई पण्डित पात्रको प्रवृत्तिप्रति व्यङ्ग्य गरेको पनि प्रष्ट पारेका छन् । उनले भनेका छन्–‘पण्डित भन्दैमा भगवान् हुँदैन । म पनि पण्डितकै छोरो हुँ । र व्यङ्ग्य भनेको नेता, पण्डित, पुलिस, डाक्टर सबैलाई गर्न पाइन्छ । कार्यक्रमको एउटा टुक्रा मात्र राखेर हिन्दू धर्मको नै विरोध गर्यो भन्ने कपोलकल्पित कुरा हो ।’

मह जोडीले यस्ता भ्रामक हल्लाले आफूहरूको काम नरोकिने र निरन्तर काम गर्ने पनि उल्लेख गरेका छन् । हरिवंश अहिले फिल्म ‘हरिबहादुरको जुत्ता’ र मदनकृष्ण फिल्म ‘पहाड’को छायांकनमा छन् ।