‘लाज शरणम्’ रोकिएपछि निर्देशक समाजले भन्यो–‘गोलवद्ध हुन जरुरी छ’

एकपछि अर्को नेपाली फिल्म अदालत वा सेन्सर बोर्डमा अड्किन थालेका छन् । फिल्म ‘एक्टरः टेक वान’को रिलिज अदालतकै आदेशका कारण दुई दिन ढिलो रिलिज भयो । 

यता, फागुनको १४ गतेबाट रिलिजमा आउन लागेको फिल्म ‘लाज शरणम्’को प्रदर्शन उच्च अदालतको आदेशसँगै अनिश्चित बनेको छ । फिल्म ‘ताण्डवम्’को मुख्य दृश्य नै काटेर ल्याउन चलचित्र जाँचपास समितिले निर्देशन दिएको छ । यस्तो अवस्थामा फिल्म निर्माण कसरी गर्ने भन्ने अन्यौलता देखिन थालेको छ । 

यसैबिच, चलचित्र निर्देशक समाजले रिलिज हुन लागेको फिल्मको प्रचार सामाग्रीमा समेत रोक लगाउने आदेशप्रति गम्भीर ध्यानाकर्षण भएको जनाएको छ । 

अध्यक्ष जनकदिप पराजुलीले जारी गरेको विज्ञप्तीमा भनिएको छ–‘फिल्म अभिव्यक्तिको माध्यम भएको र फिल्मले समाजका विभिन्न पात्र र प्रवृत्तिलाई लिएर कथानक स्वरूप दिने परम्परा सर्वविदितै छ । यसरी बनेका कथाले कुनै व्यक्ति वा समुदायको व्यक्तित्व, संस्कार, संस्कृतिलाई आघात पुर्यायो कि पुर्याएन भनेर जाँच गर्नलाई चलचित्र विकास बोर्ड र चलचित्र जाँच पास समिति आदि सरकारी निकाय अस्तित्वमा छन् । कुनै फिल्मले माथि भनेझैं व्यक्ति वा समुदायको मानमर्दन गर्ने अभिप्राय राखेको छ भने चलचित्र जाँच पास समितिसँग यस्ता फिल्मको प्रदर्शन रोक्का गर्ने अधिकार निहित हुन्छ । तर, यो प्रक्रियामा नपुगिकन फाट्टफुट्ट आएका प्रचार सामग्रीका भरमा फिल्ममाथि अंकुश लगाउने निवेदकको मनसायअनुरुप आदेश जारी हुँदा फिल्मको करोडौं लगानी जोखिममा परेको छ र यसले सिर्जनशील सर्जकलाई नराम्रोसँग झस्काएको छ ।’

निर्देशक समाजले ‘लाज शरणम्’ लगायत यस्तै प्रकृतिको कानुनी लडाइँमा रहेका अन्य फिल्महरूको साथमा ऐक्यबद्धता समेत जारी गरेको छ । साथै, अन्य फिल्मसँग सम्बन्धित पेशागत संघसंस्थालाई गोलबद्ध हुन समेत आग्रह गरेको छ । 

निर्देशक समाजले फिल्म क्षेत्रलाई विभिन्न रुपमा आक्रमण गर्ने, नकारात्मक प्रभाव पार्ने गतिविधिको पनि घर भर्त्सना गरेको छ ।