‘हलवालाको मोजा धोइदिन परे धुन तयार छु, तर शोज त देउ न’: रंगी निर्देशक

थुप्रै फिल्ममा सहायक निर्देशकको रुपमा काम गरेका सुरेश न्यौपानेले ‘रंगी’बाट आफूलाई निर्देशकको रुपमा उभ्याएका छन् । तर, उनको पहिलो सिर्जनालाई नै शोज नदिएर प्रदर्शकहरुले निमोठ्न खोजेपछि उनी आक्रोशित छन् । 

उनले मिडियाकर्मीहरुको अगाडि भने–‘हलवालाहरुको मोजा धुन परे पनि म धुन तयार छु । तर, मेरो फिल्मलाई शो देउ न ह्यार । हामीले शोजका लागि भीख माग्न मात्र बाँकी थियो । हामीले ३ महिनादेखि फागुन २ गते फिल्म रिलिज हुँदैछ भनेर प्रचार गरेका थियौं । तर, उहाँहरूको साइटमा ३ दिन अगाडि मात्र आएर हाम्रो पोस्टर राखिएको थियो । अब त अत्ती भयो । यति राम्रो फिल्म बनाउँदा बनाउँदा पनि हामीले मार्केट पाउँदैनौँ भने हामीले के गर्ने त ?’

हामीले फिल्म बाहेक केही वुझ्दैनौं भने के गर्ने भन्दै सुरेशले भने–‘राम्रो फिल्म दिँदा पनि हामीलाई शोज दिँदैन भने हामीले कहाँ गएर देखाउने हो त ? म टाउको मालिस गर्न पर्छ भने पनि गर्न तयार छु । तर, शोज त दिन पर्यो नी । फिल्म नै नहेरी सलोन र सुरेशको फिल्म रहेछ, २ शोज दिओैं भनेर टेबलमा बसेर दिन मिल्छ । हामीले उहाँहरूलाई रिझाउन के गर्नुपर्ने हो ?’ यति भन्दै सुरेश भावुक सुनिए । 

सुरेशले कही नयाँ गरौं भनेर आफूहरूले नेपालीपन बोकेको कथामा फिल्म बनाएको बताए । उनले दर्शकले फिल्म मन पराएपनि आफूहरूले शोज नपाएको भन्दै गुनासो गरे ।