नेता शर्माको  भ्यालेन्टाइन गीत

काँग्रेस महामन्त्री विश्वप्रकाश शर्माले भ्यालेन्टाइन डेको अवसरमा नयाँ गीत ‘मन त्यतै कतै’ ल्याएका छन् । शर्माको सङ्गीत रहेको गीतमा प्रमोद खरेलको स्वर, प्रमोदहरि गुरागाईँका शब्द, मनोहर सुनामको सङ्गीत संयोजन छ । निकेश खड्का निर्देशित भिडियोमा आकाश श्रेष्ठ र प्रियाना आचार्य फिचर्ड छन् ।

सङ्गीत र साहित्यमा समेत रुचि भएका शर्माले यसअघि दलित सचेतना प्रेरित गर्ने गीत पनि रेकर्ड गराएका छन् । शिव परियारको स्वर रहेको उक्त गीतमा मीन विश्वकर्माका शब्द छन् । विश्वप्रकाशले यसअघि पनि आफ्नो सङ्गीतमा केही गीत रेकर्ड गराएका छन् । नेपाल जेसिजको एल्बममा बज्ने गीत उनैले सङ्गीत गरेका हुन् । भूकम्पको त्रासदीको समयमा उनले ‘स्वीकृति’ बोलको गीत पनि ल्याएका थिए, जसमा शिशिर योगीको स्वर छ ।