ज्ञानेन्द्रले सुरु गरे ‘झिंगे दाउ २’को तयारी

निर्देशक ज्ञानेन्द्र देउजाले आफ्नो हिट फिल्म ‘झिँगे दाउ’को सिक्वेलको तयारी सुरु गरेका छन् । फिल्मको स्क्रिप्ट लेखनको काम अन्तिम चरणमा चलिरहेको समयमा उनले संगीतको काम सुरु गरेका हुन् । 

फिल्मको संगीतमा संगीतकार अर्जुन पोखरेलले काम सुरु गरेका छन् । अर्जुनले यसपटक पनि पहिलो भागको जस्तै दर्शकको मन छुने गीत तयार पार्ने बताए । यसपटक, फिल्ममा दुई जना नयाँ कलाकार हुने उनको भनाई छ । फिल्म क्षेत्रकै नाम चलेका कलाकारलाई लिने तयारी उनको छ । 

यी बाहेक पुरानै कलाकारहरू फिल्ममा दोहोरिनेछन् । ज्ञानेन्द्रका अनुसार, फिल्ममा नायिकाद्धय केकी अधिकारी र आँचल शर्मा, कलाकारहरू मुकुन भुसाल, कुशल बिष्ट, हिउवाला गौतम, अन्शु महर्जन लगायत दोहोरिनेछन् । 

फिल्ममा रोशन श्रेष्ठको एक्सन, विष्णु घिमिरेको छायांकन, मित्र डी गुरुङको सम्पादन रहने पक्का भएको छ । फिल्म ‘झिँगे दाउ’ले बक्स अफिसमा सुखद व्यापार गरेको थियो । यसपछि, ज्ञानेन्द्रले फिल्म ‘उपहार’ निर्देशन गरेका थिए ।