‘मायाबी’का निर्माता न्यौपाने भन्छन्–‘त्रिकोणात्मक प्रेमकथाको फिल्मले दर्शक तान्नेमा आशावादी छु’

‘करुणा’ नामक सिरियलमा काम गरेपछि ध्रुव न्यौपानेको मन अभिनयमा बस्यो । आज भन्दा करिब २ दशक अगाडि काठमाडौं छिरेपछि उनले अभिनय यात्रा सुरु गरेका थिए । यसपछि, उनले ३२ वटा बढी म्युजिक भिडियोमा काम गरिसकेका छन् । 

ध्रुवले फिल्म ‘मायाबी’मा लगानी गरेका छन् । यो फिल्म फागुनको १४ गतेबाट रिलिजमा आउँदैछ । यो फिल्मलाई लिएर निर्माता न्यौपाने आशावादी सुनिए । उनले फिल्म चल्नुपर्ने कारणबारे भने–‘यो फिल्मले त्रिकोणात्मक प्रेमकथालाई पर्दामा उतारेको छ । दर्शकका लागि यो कथा निकै नै मार्मिक र विशेष हुनेछ भन्ने लागेको छ । निर्देशक दिवाकर भट्टराई र सिंगो टिमको काम निकै नै उत्कृष्ट छ । यसैले, यो फिल्मबाट म आशावादी छु ।’ 

ध्रुव फिल्मसँगै होटल व्यवसायमा पनि व्यस्त छन् । उनले अभिनय गरेको पहिलो फिल्म ‘प्लान’ हो । यो फिल्ममा काम गरेपछि ध्रुवको करिअरमा अड्चन आइपर्यो । उनी, ढुकुटी काण्डमा फसे । जसकाकारण उनको करिअरमा ब्रेक लाग्यो ।

तर, पछि उनले ‘क्राइम, क्राइम २, सन्त्रास’ जस्ता फिल्ममा काम गरे । तर, ब्यानर गतिलो नपर्दा आफ्नो करिअर पनि सुखद तरिकाले अगाडि बढ्न नसकेको उनको भनाई छ । ध्रुवले फिल्म ‘हिरो रिटन्र्स’मा लगानी गरे । तर, फिल्म चल्नु भन्दा एक साता अगाडि कोरोनाका कारण लकडाउन भएपछि यो फिल्म पनि रिलिज हुन पाएन । जसको कारण, फिल्मबाट उनलाई घाटा लाग्यो । 

अहिले ध्रुवले फिल्म ‘मायाबी र नरसिंहाः अवतार’मा लगानी गरेका छन् । यी दुबै फिल्मले आफ्नो करिअरलाई पनि सुखद तरिकाले अगाडि लैजानेमा उनी विश्वस्त सुनिए ।