‘कमेडी दरबार’माथि बारम्बार किन आक्रोशित शोभित ?

अष्ट्रेलियामा रहेका निर्देशक शोभित बस्नेत कमेडी रियालिटी शो ‘कमेडी दरबार’माथि बारम्बार आक्रोश पोखिरहेका छन् ।

विशेषगरि, फिल्म ‘रंगी’को प्रमोसनका लागि यो शोजले समय नदिएको भन्दै उनको आक्रोश पोखिएको हो ।

केही दिन अगाडि शोभितले जयकिशन बस्नेतलाई पनि अतिथि बनाउनुपर्ने नत्र रंगीको प्रमोशन नगर्ने भन्दै कमेडी दरबारबाट कुरा आएको भन्दै आक्रोश पोखेका थिए । तर, पछि शोभित र यो शोका निर्देशक विक्की अग्रवालबीच कुराकानी भएपछि उनले स्टाटस हटाएका थिए । 

तर, शोभितको आक्रोश अझै यो शोलाई लिएर रोकिएको छैन । उनले लेखेका छन्–‘आज रंगीले सम्पूर्ण दर्शक तथा मिडियाकर्मीको साथ पाएको छ, कमेडी दरबार बाहेक । जे होस् त्यो टिमले नम्रता श्रेष्ठलाई अति माया गर्दोरहेछ । मात्र उडाएर आफ्नो घरको चुल्हो बाल्नको लागि ।’

यो शोको होस्टमा नम्रता श्रेष्ठ छिन् जो ‘रंगी’की मुख्य नायिका हुन् । तर, होस्ट नै नायिका बनेको फिल्मलाई समेत यो शोमा स्थान नदिइएको भन्दै शोभितको आक्रोश पोखिएको हो । 

फागुन २ गतेबाट रिलिजमा आउन लागेको यो फिल्मलाई सलोन बस्नेतले निर्माण गरेका हुन् । सुरेश न्यौपाने फिल्मका निर्देशक हुन् ।