‘रोल नम्बर १ र पूर्ण बहादुरको सारङ्गी २’ निर्माणको घोषणा

सेभेन सिज सिनेमाले एकसाथ दुई फिल्म निर्माणको घोषणा गरेको छ । आइतबार आयोजना गरिएको फिल्म ‘पूर्ण बहादुरको सारङ्गी’को सफलता पार्टीमा एकसाथ दुई फिल्म निर्माणको घोषणा गरिएको हो । 

निर्माता विनोद पौडेलले फिल्म ‘रोल नम्बर १ र पूर्ण बहादुरको सारङ्गी २’ बनाउने घोषणा गरे । तर, नयाँ कम्पनी घोषणा गर्दै दुई फिल्म निर्माणको जानकारी दिइएको हो ।
 
सेभेन सिज सिनेमाले बनाउने फिल्म ‘रोल नम्बर १’मा कार्यकारी निर्माताको रुपमा रमेश चौलागाईं कार्यकारी निर्माताको रुपमा छन् । फिल्ममा जयन योञ्जनको कथा तथा निर्देशन रहने पक्का भएको छ । 

महेश दवाडीको पटकथा तथा संवाद रहने यो फिल्ममा प्रशान्त सिवाकोटीको संगीत रहनेछ । शिवराम श्रेष्ठले खिच्ने यो फिल्मलाई आउँदो बर्ष रिलिज गर्ने जानकारी दिइयो ।

फिल्म ‘पूर्ण बहादुरको सारङ्गी २’को बिषयमा भने केही पनि बताइएको छैन । कार्यक्रममा फिल्मलाई ऐतिहासिक रुपमा सफलता दिलाउन सहयोग गर्ने प्राविधिक, कलाकार, वितरक, पत्रकार र हल संचालकहरुलाई सम्मानपत्र प्रदान गरिएको थियो । कार्यक्रममा फिल्मसँग जोडिएका कलाकार र प्राविधिकहरूलाई बोनस समेत वितरण गरिएको थियो । 

यो फिल्मले रिलिजको ८८ औं दिनसम्म आइपुग्दा बक्स अफिसमा ४७ करोड भन्दा माथिको ग्रस कलेक्शन गरेको बताइएको छ । साथै, विश्वव्यापी रुपमा फिल्मले ७५ करोड ग्रस कलेक्शन गरेको जानकारी पनि दिइयो ।