‘पारी त्यो डाँडाँमा’को सिक्वेल गीत ‘फेरि जालमा’ रिलिज हुने

वि.सं २०७२ सालमा रिलिजमा आएको फिल्म ‘रेशम फिलिली’को एउटा गीत ‘पारी त्यो डाँडाँ’मा ले दर्शकको उत्साहजनक साथ पायो । आजको जस्तो समय हुन्थ्यो भने त्यो गीत भाइरल हुन्थ्यो होला । तर, उक्त समयमा फिल्मको यो गीतले सर्वत्र चर्चा पायो । अडियो मात्र सार्वजनिक भएको गीत यसरी चल्यो कि, निर्माणपक्षलाई भिडियो सार्वजनिक गर्न नै गाह्रो भयो । यो गीतका कारण फिल्मले पनि हाइप बनायो । तर, फिल्म चलेको भोलिपल्ट अर्थात् वैशाखको १२ गते शक्तिशाली भूकम्प गयो । जसकाकारण, फिल्मको प्रदर्शन नै रोकियो । 

यही फिल्मले झन्डै एक दशक पार गर्नै लाग्दा यसको सिरिज ‘फेरि रेशम फिलिली’ रिलिजको तयारीमा छ । फागुनको १४ गतेबाट यो फिल्म रिलिजमा आउँदैछ । फिल्मको प्रदर्शन मिति नजिकिदै जाँदा ‘जालमा’ गीतको सिक्वेल ल्याउने तयारी गरिएको छ । निर्माणपक्षले छायांकनको तस्वीर सार्वजनिक गरेको छ । सार्वजनिक तस्विरमा फिल्मका मुख्य कलाकारहरू विनय श्रेष्ठ र सुपुष्पा भट्टलाई फिचरिङ गरिएको छ । सार्वजनिक तस्विरमा उनीहरुलाई दुई हात बाँधेर रंगीन छाताहरूले सजाइएको रुखाकृतिको अगाडि बसिरहेको देख्न सकिन्छ ।

कालीप्रसाद बास्कोटाको संगीतमा तयार भएको यो गीतलाई मानसराजले लेखेका हुन् । गायनमा कालीप्रसाद र सोमिया बराइलीको स्वर छ । प्रदीप लामाले कोरियोग्राफी गरेको यो गीत पहिलेको गीत जस्तै लोकप्रिय हुने निर्माणपक्षको विश्वास छ । सिनेमा आर्ट र वि मोसन पिक्चर्सको सहकार्यमा निर्माण भएको यो फिल्मका लेखक तथा निर्देशक निरोज महर्जन हुन् ।

रौनक विक्रम कँडेलको निर्माणमा तयार भएको यो फिल्ममा सुरज बम ठकुरी कार्यकारी निर्माता र एनि थापा सह–निर्माताको रुपमा छन् । यो फिल्ममा विनय श्रेष्ठ, सुपुष्पा भट्ट, नीर शाह, कामेश्वर चौरासिया, प्रकाश घिमिरे, शिशिर वाङ्देल, रविन्द्र झा, लक्ष्मी गिरी, महेश त्रिपाठी, एवनराज उप्रेति, मेक्सम गौडेल, प्रकाश घिमिरे, सजन थापा लगायतका कलाकारहरुको अभिनय छ ।

सुसन प्रजापतिको छायांकन, आकाश बराल र निर्देशक महर्जनको पटकथा, नरेश किङ्ग योगीको एक्सन, कालीप्रसाद बाँस्कोटा, एसडी योगी, हर्क साउद, जयन जे वाइवा र दीपक शर्माको संगीत, सुरेन्द्र पौडेलको सम्पादन यो फिल्ममा छ ।