‘लाज शरणम्’को पोस्टरमा ‘आलम’को गेटअपमा देखिए ‘धुर्मुस’

फागुनको १४ गतेबाट रिलिजमा आउन लागेको फिल्म ‘लाज शरणम्’को नयाँ पोस्टर सार्वजनिक भएको छ । सार्वजनिक नयाँ पोस्टरमा कलाकार सिताराम कट्टेल ‘धुर्मुस’लाई फरक गेटअपमा देख्न सकिन्छ । उनी पूर्व मन्त्री मोहम्मद आफताब आलमको भेषमा देखिएका छन् ।

उनको यही गेटअपका कारण पोस्टरले चर्चा पाइरहेको छ । फिल्ममा सितारामको भूमिका के हो र कति छ भन्ने खुलेको छैन । तर, उनको गेटअपले दर्शकमाझ उत्साह छर्ने संकेत दिएको छ । यो पोस्टरमा उनी बाहेक मुकुन्द श्रेष्ठ, महेश त्रिपाठी, विजय बराल, अर्पण थापा र कमलमणि नेपाललाई पनि प्रस्तुत गरिएको छ । धुर्मुसको चरित्र राजनीतिसँग जोडिएको प्रष्ट हुन्छ ।

पोस्टरमा कफिन बोकेका स्थानीयहरुको दृश्य समेत समावेश छ । यो फिल्ममा अर्जुन घिमिरे, सागर लम्साल, हरिष निरौला, प्रियाना आचार्य, रेणु योगी, सागर लम्साल, विजय लामा, माला लिम्बु लगायतको पनि अभिनय छ ।

कुमार कट्टेलको निर्देशनमा तयार भएको यो फिल्ममा नविन श्रेष्ठको लगानी छ । फिल्ममा राम नरेश शाह र श्रृजना खड्का सह–निर्माताको रुपमा छन् । सुदिप बरालको छायांकन रहेको यो फिल्मले राजनीति र जनताको कथा भन्छ ।