लामो समय पछि सुशान्तको नेपाल कन्सर्ट

लोकप्रिय गायक सुशान्त केसी नेपालमा गुन्जिने निश्चित भएको छ । साढे २ वर्षपछि उनले आफूले नेपाल कन्सर्ट गर्न लागेको घोषणा गरेका छन् । कन्सर्टको मिति भने तय हुन बाँकी छ । यसबारे विस्तृत विवरण आउन बाँकी रहेको सुशान्तले जनाएका छन् ।

‘नेपालमा पछिल्लो पटक प्रस्तुति दिएको कति वर्ष भयो अनुमान लगाउन सक्नुहुन्छ ? फर्किन अधैर्य छु’ नेपाल कन्सर्टको घोषणा गर्दै सुशान्तले लेखेका छन् ।

सन् २०२४ को तथ्याङ्क अनुसार केसी इन्टरनेट प्लेटफर्ममा सबैभन्दा सुनिने नेपाली गायक हुन् । बितेको वर्ष उनलाई स्पोटीफाईमा ४४ मिलियन पटक सुनिएको थियो।

युट्युबमा उनलाई पछ्याउनेको सङ्ख्या २० लाख नाघेको छ भने उनलाई युट्युबमा हेर्नेको सङ्ख्या ५३ करोड ५० लाख पुगेको छ । उनको पछिल्लो गीत ‘बार्दली’ सांस्कृतिक परिघटना नै बन्यो जसमाथि १० लाखभन्दा धेरै टिकटक भिडियो बने । स्पोटीफाईमा गत वर्ष सज्जन राज वैद्यलाई उछिन्दै उनी प्लेटफर्ममा धेरै सुनिने गायक बनेका हुन् ।