शिल्पा भन्छिन् विग बोसमा विजेता पहिले नै तय हुन्छ

विवादित टिभी शो बिग बोस–१८ फाइनलतर्फ अघि बढिरहेको छ । यसैबिच टिभी अभिनेत्री तथा बिग बोस सिजन ११ की विजेता शिल्पा शिन्देको एउटा भिडियो भाइरल भइरहेको छ, जसमा उनले शोका निर्माताहरूमाथि दर्शकलाई मूर्ख बनाएको आरोप लगाएकी छिन् ।

भाइरल भिडियोमा शिल्पा भन्छिन्, ‘मलाई थाहा छैन, तर कतिपयले थाहा पाइसकेका छन् कि निर्माताहरुले यसको विजेता तय गर्छन् । उनीहरू आफैँ छान्छन्, घरबाट उठाउँछन् र देखाउँछन्। अब च्यानलको कस्तो रणनीति छ, जनतालाई पनि थाहा भइसकेको छ, त्यसैले मानिसहरूले शो धेरै हेरिरहेका छैनन् । किनकि तपाईँले कसैलाई केही हदसम्म मात्र मूर्ख बनाउन सक्नुहुन्छ।’

शिल्पाको भिडियोमा प्रयोगकर्ताहरूले पनि चर्को कमेन्ट गरिरहेका छन् । एकले लेखे, 'यो साँचो हो।' 

अर्कोले लेखे, ‘यसको मतलब यो हो कि निर्माताले तपाईँलाई विजेता बनाए, तपाईँ त्यति हकदार हुनुहुन्नथ्यो।' 

 बिग बोस सिजन ११ मा शिल्पा शिन्दे र हिना खानबिच कडा प्रतिस्पर्धा भएको थियो तर ट्रफी शिल्पा शिन्देले जितेकी थिइन् । त्यति बेला पनि सामाजिक सञ्जालमा धेरैले हिना खान नै ट्रफी जित्नको हकदार हुन् भन्ने विश्वास गरेका थिए । बिग बोस सिजन १८ को ग्रान्ड फिनाले जनवरी १९ मा हुँदै छ।