घाइते भएपछि रोकिए रश्मिकाका फिल्म

भारतीय अभिनेत्री रश्मिका मन्दाना शुक्रवारबाट ‘सिकन्दर’ फिल्मको अन्तिम छायाङ्कनमा जुटेकी थिइन् । आयुष्मान खुरानासँगको फिल्म ‘थामा’को छायाङ्कन समेत थालेकी थिइन् ।

तर चोटको कारण उनका सबै फिल्मको छायाङ्कन तत्काललाई रोकिएको छ । जिममा चोट लागेपछि रश्मिकाका सबै फिल्मको छायाङ्कन तत्काललाई रोकिएको पिंकभिल्लाले उल्लेख गरेको छ ।

उनलाई व्यस्त तालिका पुनः थाल्नुअघि पूर्ण रूपमा सन्चो हुन छोटो ब्रेक लिन सल्लाह दिइएको छ । उनको अवस्था सामान्य रहेको र चाँडै सेटमा फर्किनेमा आशा गर्न सकिने जनाइएको छ ।

यसअघि मिड डेमा प्रकाशित रिपोर्टअनुसार सलमान खान र रश्मिकाले जनवरी १० मा मुम्बईमा सिकन्दरको अन्तिम चरणको छायाङ्कन सुरु गर्ने तयारी गरेका थिए । यो फिल्म आउँदो मार्चमा रिलिज तयारीमा छ । 

अहिलेसम्मकै धेरै कमाउने भारतीय फिल्म बनेको ‘पुष्पा २’ पछि रश्मिका यति बेला पुनः लाइमलाइटमा छिन् ।