‘ममी’को पोस्टरमा प्रियंका र कालो बिरालो

समर निरौलाको निर्देशनमा तयार भएको फिल्म ‘ममी’को नयाँ पोस्टर निर्माणपक्षले सार्वजनिक गरेको छ । निर्माणपक्षले सार्वजनिक गरेको पोस्टरमा नायिका प्रियंका कार्कीलाई मात्र स्थान दिइएको छ । 

प्रियंका डर मिश्रित भावमा छिन् । साथमा, उनको छेउमा एउटा कालो बिरालो समेत देखाइएको छ । यस्तै, भित्तामा रहेको फोटो फ्रेममा सुलक्षण भारती, आयुषी ढकाल र जेभिस श्रेष्ठको तस्वीर देख्न सकिन्छ । फोटो फ्रेमको काँच फुटेको छ । यसैले, यो फिल्मलाई नकारात्मक शक्तिले आक्रमण गरेको प्रष्ट हुन्छ । 

हरर पारिवारिक कथामा निर्माण भएको यो फिल्ममा प्रियंकाको साथमा दीया मास्के, सुलक्षण भारती, समिप निरौला, घनश्याम जोशी, जेभिस श्रेष्ठ, गीत बिष्ट लगायतका कलाकारहरुको अभिनय छ ।

सो ट्वान्टी फाइभको प्रस्तुतिमा निर्माण भएको यो फिल्ममा समर निरौला, पूर्णिमा जोशीको लेखन, लोकराज जोशी र पूर्णिमाको लगानी छ । सुमन कोइराला फिल्मका कार्यकारी निर्माता हुन् । यो फिल्ममा निशाल पौडेल र शरद महत्तोको छायांकन, सुरेन महर्जनको सम्पादन, दीपेश चौधरी र एसडी योगीको संगीत छ ।