प्रकाश सपुतको 'वसन्त' पोस्टर सार्वजनिक

प्रकाश सपुतले आफू निर्देशित फिल्म ‘वसन्त’को पोस्टर सार्वजनिक गरेका छन् । पोस्टरमा सपुत स्वयम फिचर्ड छन् । लक्ष्मीप्रसाद देवकोटा र पारिजातको भित्ते तस्बिर सामुन्ने उनको पात्र अध्ययनमा  व्यस्त देखिन्छ । 

फिल्ममा सपुतको निर्माण, निर्देशनसहित अभिनय, लेखन, गायन र सङ्गीत छ । सपुतले पोस्टर सार्वजनिक गर्दै यो फिल्म निर्माणको क्रमका हैरानी र दुःखका किस्सा उल्लेख गरेका छन् ।

उनले ‘पूर्णबहादुरको सारङ्गी’को प्रचारमा समय दिन नपाएको सन्दर्भ समेत कोट्याउँदै लेखेका छन्–

'मैले “वसन्त” मा म भित्रका सबै रङ्गहरू पोखेको छु । यदि वसन्त तपाईँलाई बबाल लाग्यो भने, म बबाल हु । यदि लागेन भने पनि मेरो प्रतिभाको दायरा यत्ति नै हो । मेरो सीमितता यही सम्म हो ! मैले यहाँ भन्दा थप केही जान्दिन । यसो भनौँ, म यो जन्मका लागी जम्मा जम्मी यत्ति नै हु ! वसन्त जत्ति !

अब बाकि कर्महरू यसकै निरन्तरता हुनेछन् । लेखन, सिर्जना, गायन, अभिनय, निर्देशन, निर्माण, जीवनमा अगाडि जुन कर्म गरे पनि त्यो वसन्तकै एउटा रङ्ग हुनेछ ! किनकि यो जन्मका लागी म जम्मा जम्मी यत्ति नै हु ! वसन्त जत्ति..

अनि सुन्नुस् न , हुन त बल्ल शिशिर रितु सुरु हुदैछ तर हामीलाई वसन्त लागिसक्यो । अर्को हप्ता देखि एक-एक थुङ्गा लालीगुराँस तपाईँलाई सप्रेम उपहार पठाउदैछौ । चैत्र २२ ( April 4)को निम्तो सम्झेर स्विकार्दै जानु होला है'

फिल्ममा स्वस्तिमा खड्का, खड्गबहादुर पुन, प्रभात पाल, श्री शिभांसी, उर्मिला लाम्गादेको समेत अभिनय छ । गलबन्दी प्रोडक्सनको ब्यानरमा बनेको फिल्ममा मोहन विश्वकर्मा र बिन्दु बोहरा छन् । कार्यकारी निर्मातामा अनुरोध भट्टराई, नाना थकाली र वीरेन्द्रनारायण श्रेष्ठ छन् । यो फिल्म २२ चैत (अप्रिल ४)मा प्रदर्शन हुने जनाइएको छ ।