टङ्क बुढाथोकीको फिल्ममा निता

गायक एवं सङ्गीतकार टङ्क बुढाथोकीले निर्माण तथा निर्देशन गर्न लागेको फिल्म 'मन बिनाको धन ठुलो कि धन बिनाको मन' का कलाकारको सुची टङ्कले सार्वजनिक गर्न सुरु गरेका छन् । 

उनको हिट गीत 'मन बिनाको धन ठुलो कि धन बिनाको मन' शीर्षकमा बन्ने फिल्ममा मुख्य भूमिकाका बाल गायक अशोक दर्जी हुनेछन् । फिल्ममा अशोकसँगै सरोज खनाल, निता ढुङ्गाना, रमेश विश्वकर्मा, बुद्धि तामाङ, रवीन्द्र झा, एआर बुढाथोकी, शङ्कर श्रेष्ठ, साम्राज्ञी थापा लगायतका कलाकारको अभिनय रहनेछ । अन्य केही प्रमुख कलाकारहरू अझै फाइनल हुन बाँकी रहेको र अब केही दिनमा नै फाइनल गरिने बुढाथोकीले बताएका छन् । 

फिल्मको कथा निर्माता निर्देशक टङ्क बुढाथोकी आफैले लेखेका हुन् भने पटकथा र संवाद शिवम अधिकारीले लेखेका हुन् । छिट्टै फ्लोरमा जाने फिल्म सौरभ लामाले छायाङ्कन गर्नेछन् । सामाजिक विषयवस्तुमा निर्माण हुने फिल्म बैंकटेश इन्टरटेन्टमेन्टले वितरणको जिम्मा लिएको छ।