काठमाडौँमा जुबिनको साङ्गीतिक प्रस्तुति

भारतीय गायक जुबिन नौटियालले पहिलो पटक नेपालमा साङ्गीतिक प्रस्तुति दिने भएका छन्  । उनले आउँदो १७ फागुन (१ मार्च) मा काठमाडौँ मा कन्सर्ट गर्न लागेका हुन् । बलिउडका चर्चित पार्श्व गायक समेत रहेका जुबिनको काठमाडौँको हायात रिजेन्सी ग्राउन्डमा लाइभ प्रस्तुति रहने छ । यो च्यारिटी कन्सर्टबाट प्राप्त हुने रकम अटिजम भएका व्यक्तिका लागि खर्च गरिने भएको छ ।

एन–अटिजम केयर फाउन्डेसनले आयोजना गरेको यो कन्सर्ट यसअघि २९ मङ्सिरमा तय गरिएको थियो तर विविध कारणवश पछि सर्‍यो। टिकट पार्टनरको रूपमा रहेको खल्तीले टिकट बिक्री थालेको खल्तीका चिफ बिजनेस अफिसर अविनाश गुप्ताले बताए ।

सन् २०१४ मा रिलिज भएको बलिउड फिल्म ‘सोनाली केबल’मा पार्श्व गायन गर्दै साङ्गीतिक करिअर थालेका नौटियालले नेपाली फिल्म ‘प्रेमगीत ३’ को हिन्दी संस्करणमा समेत स्वर दिएका छन् ।

उनले गाएको फिल्म ‘शेरशाह’को गीत ‘रात लम्बियाँ’ त्यस्तै ‘बजरंगी भाइजान’को ‘जिन्दगी कुछ तो बता’, ‘तु सुरज में साँझ’ लगायत हिट छन् ।