सरोजको नयाँ फिल्ममा दीपकराज फाइनल

निर्माता सरोज न्यौपानेको निर्माणमा तयार हुन लागेको नयाँ फिल्ममा  मुख्य कलाकार फाइनल गरिएको छ । 

यो फिल्ममा कलाकार दीपकराज गिरीले काम गर्ने पक्का भएको हो । आज फिल्मको निर्माणपक्ष र दीपकराजविच कागजी संझौता भएको हो । 

आमा सरस्वती मुभिजको व्यानरमा निरन्तर काम गरिरहेका दीपकले बाहिरी व्यानरमा काम गर्न लागेका हुन् । 

यो फिल्मका अन्य कलाकार र निर्देशक भने फाइनल भएका छैनन् । मेरो फिल्मसँग कुरा गर्दै दीपकले भने–‘फिल्मको कथावस्तु निकै राम्रो छ । यसैले, म काम गर्न उत्साहित भएको हुँ । ‘छक्का पन्जा ६’ निर्माण नभइन्जेलसम्म म बाहिरी ब्यानरका फिल्ममा काम गर्छु ।’

निर्माता सरोज न्यौपानेले पनि दीपकलाई फिल्ममा अनुबन्धित गरिएको पुष्टि गरे । फिल्मको प्रदर्शन मिति आउँदो बर्षको तिहारमा फाइनल गरिएको छ । फिल्मका अन्य कलाकारहरू चाँडै नै फाइनल गरिने निर्माणपक्षले बताएको छ । 

‘६ एकान ६ देखि छक्का पन्जा ५’सम्म आइपुग्दा दीपकले बाहिरी ब्यानरका फिल्ममा काम गरेका छैनन् । अब भने उनी ‘छक्का पन्जा ६’ अगाडि बाहिरी ब्यानरका फिल्ममा काम गर्ने सोचमा अगाडि बढेका छन् ।