भुवन लोहनीको ‘कुन देवको सृष्टि हौ...’ सार्वजनिक

गीतकार तथा मोडल भुवन लोहनीको नयाँ गीत कुन देवको सृष्टि हौ... को भिडियो क्रिसमस २०२४ को अवसरमा सार्वजनिक गरिएको छ। यो गीत कृपा फाउन्डेसनको अफिसियल युट्युब च्यानलबाट सार्वजनिक भएको हो। 

गीतमा सविन सुवेदी र समीक्षा अधिकारीको स्वर छ। भुवन लोहनीकै शब्दमा तयार भएको यो गीतमा संगीत बसन्त सापकोटाको रहेको छ। डोरेमी स्टुडियोमा भानुभक्त ढकालले रेकर्डिङ गरेको गीतलाई श्याम बागदासले मिक्सिङ र मास्टरिङ गरेका हुन्।

भिडियोमा भुवन लोहनी र उषा उप्रेतीको अभिनय देख्न सकिन्छ। उनीहरूको जोडीलाई प्रेम भावमा प्रस्तुत गरिएको छ। भिडियोको निर्देशन र कोरियोग्राफी मौसम हिमालीले गरेका छन्। सिनेमाटोग्राफी नवराज उप्रेती र सम्पादन तथा रंग संयोजन मनोज कार्कीको रहेको छ।
केही वर्षदेखि अमेरिकामा बस्दै आएका भुवन लोहनीले यसअघि आधा दर्जनभन्दा बढी म्युजिक भिडियोमा अभिनय गरिसकेका छन्। भर्खरै मात्र सार्वजनिक भएको बाबा आमा बोलको गीतपछि उनको यो नयाँ गीत रिलिज भएको हो।
प्रेम भाव झल्कने यो आधुनिक गीतले श्रोताहरूको राम्रो प्रतिक्रिया पाउने अपेक्षा गरिएको छ।