‘रंगी’को दोस्रो पोस्टरमा खुशी सलोन

आगामी फागुन २ गतेदेखि प्रदर्शन हुने फिल्म ‘रंगी’ को दोस्रो पोस्टर सार्वजनिक भएको छ । यो फिल्मको निर्माणपक्षले शुक्रबार नयाँ पोस्टर सार्वजनिक गरेको हो । सार्वजनिक पोस्टर रमाइलो छ । 

पोस्टरमा कलाकार सलोन बस्नेत, नम्रता श्रेष्ठ र बाल कलाकार आयुषी ढकाल प्रस्तुत छन् । साइकलमा रहेका सलोनले फुडमाण्डुको ब्यागमा आयुषीलाई बोकेका छन् । सलोन र आयुषी खुशी मुद्रामा छन् । सलोनको अगाडि नायिका नम्रता लजालु भावमा उभिएकी छन् । पात्रको पृष्ठभूमिमा वसन्तपुर दरबार स्क्वायरको गल्ली देख्न सकिन्छ ।

अभिनेता सलोन बस्नेत प्रस्तुतकर्ता रहेको यो फिल्मले बाबुछोरीको कथा प्रस्तुत गर्नेछ । यो फिल्मलाई निर्देशक सुरेश न्यौपानेले निर्देशन गरेका हुन् । यो उनको ‘डेब्यू’ निर्देशन हो ।

सान्भी इन्टरटेनमेन्ट प्रालिको व्यानरमा निर्माण भएको फिल्ममा सलोन बस्नेत, नम्रता श्रेष्ठ, दिलीप रायमाझी, आयुषी ढकाल, उत्तम केसी,  सुमिन गुरुङ, र विशाल पहारीको अभिनय छ ।  ‘मिस वल्र्ड नेपाल २०२०’ विजेता नम्रता श्रेष्ठको यो डेब्यू फिल्म हो । 

सक्षम सुवेदी र करिश्मा केसी बस्नेतको निर्माण, सुमन गजमेरको लेखन, सौरभ लामाको छायांकन, बन्दे प्रसादको सम्पादन रहेको फिल्मलाई एप्पल इन्टरटेनमेन्ट, एफडी र रिच इन्टरटेनमेन्टले वितरण गर्दैछ ।