सौगातका फिल्म निरन्तर फ्लप, तर छैन कामको अभाव

नायक सौगात मल्ल अभिनित फिल्म ‘बमबहादुर’ शुक्रबारदेखि हलमा लाग्यो । यो फिल्मले शुक्रबार पनि दर्शकको साथ पाएन । शुक्रबार र शनिबार नै हलमा दर्शक नआएपछि आइतबारबाट अधिकांश हलले शोज हटाए । केही हलमा मात्र यो फिल्मको शोज बाँकी छ । 

नायक सौगात मल्लको अनुहारले पनि दर्शकलाई हलसम्म आकर्षित गर्न सकेन । उसो त, यो फिल्मका लागि सौगातले खासै समय पनि दिएका थिएनन् । प्रचारमा उनले जम्मा एक दिन मात्र समय दिएका थिए । 

सौगातका फिल्मको इतिहास हेर्ने हो भने केही चलेका टिमसँग बाहेक उनको फिल्म चलेका छैनन् । उनको ८ महिना अघि फिल्म ‘रेड सुटकेस’ रिलिजमा आएको थियो । यो फिल्मले पनि बक्स अफिसमा कुनै कमाल गरेन । 

फिल्म ‘अगस्त्य: च्याप्टर १’ नेपाली बक्स अफिसमा सफल नभएपनि सौगातको कामको भने निकै चर्चा भयो । यो फिल्ममा उनको गेटअप र अभिनयको तारिफ अहिले पनि भइरहेको छ । फिल्म ‘हात्तीछाप’ पनि बक्स अफिसमा बिजोग नै भयो । यो फिल्ममा त सौगातको अभिनयलाई पनि दर्शकले रुचाएनन् । 

सौगातका ‘लुट, कबड्डी’ जस्ता फिल्मलाई छाड्ने हो भने अधिकांश फिल्म बक्स अफिसमा असफल छन् । तर, फिल्मको असफलताले उनलाई कुनै असर गरेको छैन । किनकी, उनको बुलन्द अभिनयले सधैं नै चर्चा पाउँछ ।

यहीकारण, सौगातको हातमा फिल्मको अभाव नभएको हो । उनी, निरन्तर फिल्मको सेटमा छन् । एउटा फिल्मको काम सकिने वित्तिकै अर्को फिल्ममा सौगात जोडिने गरेका छन् ।