दयाहाङको ६ महिनापछि नयाँ फिल्म रिलिज हुँदै, कस्तो होला ‘कार्साङ्ग’को व्यापार

नायक दयाहाङ राई गतबर्ष फिल्म नै फिल्म रिलिज भएका थिए । तर, यो बर्ष दयाको असार महिनादेखि नयाँ फिल्म रिलिजमा आएको छैन । उनी अभिनित नयाँ फिल्म ‘कार्साङ्ग’ पौषको २६ गतेबाट रिलिजमा आउँदैछ । फिल्म ‘घर ज्वाइँ’ रिलिजमा आएको ६ महिनापछि दयाको नयाँ फिल्म हलमा लाग्न लागेको हो । 

यसैले पनि यो फिल्म दर्शकको प्रतीक्षामा छ । दया पनि यो फिल्मबाट उत्साहित छन् । फिल्मको प्रचारमा दयाले साथ नदिएको आरोप पनि लाग्दै आएको थियो । तर, निर्माणपक्षले अब दयाले फिल्मको प्रचारमा साथ दिने बताएको छ । आम ग्रामीण परिवेशको एक परिवारको जिम्मेवार अभिभावकको भूमिकामा उनी देखिदैछन् । अभाव र दुःखबीच आफ्नो जातिको सँस्कारलाई जोगाउने इमान्दार चरित्रमा उनी देखिनेछन् । 

यो फिल्मले अभाव र इमान्दार समाजका भुइँ मान्छेहरू कसरी आफ्ना आफन्त र समाजबाट पाखा लगाइहाल्छन् भन्ने ‘कार्साङ’ले देखाउने यसको टिजरले देखाइसकेको छ । 

प्रायः दयाहाङ हाइफाई र छटपटे भन्दा मौलिक कथामार्फत फिल्ममा देखिँदै आएका लोकप्रिय कलाकार हुन् । यसपटक भने उनलाई दर्शकले शेर्पा समुदायको कथामा हेर्न पाउनेछन् । यम शेर्पाको डेब्यू निर्देशनमा तयार भएको यो फिल्ममा दयासँगै सिर्जना निङलेखु, जितु नेपाल, दीया मास्के, वुद्दि तामाङ, श्रृष्टी गौतम लगायतका कलाकारहरुको अभिनय छ ।

यार्सा फिल्मस् र पुरुषोत्तम प्रधान फिल्मस् प्रस्तुतिमा निर्माण भएको फिल्ममा पुरुषोत्तम प्रधान छायांकार हुन् । फिल्ममा उनको पनि लगानी छ । फिल्मका सह–निर्माता गोविन्द बोहरा हुन् भने कार्यकारी निर्माता आङ छिरिङ शेर्पा हुन् ।