छायांकन अगावै ‘सोल्टिनी’को फस्टलुक रिलिज

फिल्म ‘सोल्टिनी’को फस्टलुक सार्वजनिक गरिएको छ । फिल्मको छायांकन अगावै यसको पोस्टर सार्वजनिक गर्दै निर्माणपक्षले नयाँ शैलीको प्रचार अपनाएको हो । अर्जुन सुवेदीको निर्देशनमा बन्न लागेको यो फिल्ममा नायक प्रकाश सपुत र नायिका परीक्षा लिम्बुको मुख्य भूमिका छ ।

सार्वजनिक पोस्टरमा दुबै कलाकार भावुक छन् । यसले, यो फिल्म वियोगान्त कथामा निर्माण हुन लागेको वुझ्न सकिन्छ । फिल्ममा सपुत ‘भीमसेन पोखरेल’ र परीक्षा ‘दिलासा राई’को भूमिकामा देखिदैछन् । फिल्मको छायांकन भोजपुरमा गरिनेछ ।

समाजमा व्याप्त जातीय भेदभाव र अमानवीयताको विरुद्धमा यो फिल्मले आवाज उठाउने बताइएको छ । फिल्ममा विल्सन विक्रम राई, सब्बु गुरुङ, रवीन्द्र झा, प्रकाश घिमिरे, प्रेम सुब्बा, कविता आले लगायतका कलाकारहरुको अभिनय रहनेछ ।

फिल्ममा प्रशान्त सिवाकोटी र हर्कुलस बस्नेतको संगीत, सुशन प्रजापतिको छायांकन, अर्जुन सुवेदी र कुमार भट्टराइको लेखन छ । प्लानेट थ्री फिल्मस्को प्रस्तुति तथा नेपसिने र योलो इन्टरटेन्मेन्टको सहकार्यमा निर्माण हुने यो फिल्ममा रेजिना बिस्ट र संसार चौलागाईंको लगानी रहनेछ ।

पुसको अन्तिम साता छायांकन सुरु हुने फिल्मलाई आउँदो बर्षको असोज ३ गतेबाट रिलिज गर्ने तयारी गरिएको छ ।